Link açıqlığı

Rusiye nezaretindeki Qırım parlamenti, dekabr 29 künü, işğal etilgen Qırımnıñ prokurorı vazifesine Oleg Kamşılovnı tayin etti. Bu aqta qarar qırımdaki parlamentniñ sitesinde derc etilgen.

Kamşılovnıñ prokuror olaraq tain etilmesine taqdimnameni Rusiye baş prokurorınıñ muavini Leonid Korjinek oqudı. O Kamşılovnı «savatlı ve faal idareci» olaraq tanıttı, öz yararlıqları içün «defalarca rağbetlengenini» ayttı.

«Kamşılov Qırım Cumhuriyet prokuraturasınıñ işini keregi kibi teşkil ete bilecek», – dedi Korjinek.

Oleg Kamşılov 1969 senesi Omsk vilâyetinde doğdı. Omskta şeer prokurorınıñ birinci muavini, Krasnoyarsk vilâyet prokurorınıñ birinci muavini olıp çalışqan edi. Kamşılov «Vatan ögündeki yararlıqları içün» II derece orden medali ve «Rusiye Federatsiyası prokuraturasınıñ muhterem hadimi» mukâfat tamğasınen rağbetlendirilgen.

İşğal etilgen Qırımnıñ evelki prokurorı Natalya Poklonskaya, Rusiye Devlet Dumasına drputat olaraq saylanılğan soñ bu vazifesinden çetleşken edi. Onıñ birinci muavini Andrey Fomin, yarımadada baş prokuror vazifesini eda etip başladı.

XS
SM
MD
LG