Kreml kontrolündeki Canköy şeet şurası, şeer memuriyetiniñ yolbaşçısı vazifesinde Eduard Selivanovnı tainledi. Bu aqta qarar dekabr 27 künü şeer şurasınıñ toplaşuvında qabul edildi.
«Rey berüvde 22 deputat iştirak etti, olradan 20 öz reylerini Selivanovqa berdi, eki rey tabaqası bozulğan olaraq qabul etili», – dep haber ete Krıminform.
Agentlikte qayd eteler ki, şeer memuriyetiniñ yolbaşçısı vazifesine teklif etilgen namzetler, Kreml kontrolündeki Qırım baş naziriniñ muavini Yüriy Gotsünük reberliginde tertiplengen yarış komissiyası tarafından tain etilgen ediler. Komisiyağa beş insannıñ vasiqaları yollanılğan edi, olar baqılğan soñ ekisi qaldı – Eduard Selivanov ve Oleg Mironenko. Bundan ögüne Selivanov, işğal etilgen Canköynde memuriyet yolbaşçısının muavini edi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
