Qırımnıñ Yedi Quyu rayonındaki Şçölkino şeerinde 2016 senesi dekabr 22-de tamir işleri yekünlengen Şçölkino bala sanat mektebiniñ açılış merasimi olıp keçti. Bunı Kreml kontrol etken Yedi Quyu rayonı memuriyetiniñ matbuat hızmeti bildire.
«Qırımda «sıfırdan» tamir etilgen qoşma tasilniñ birinci oquv yurtudır. 13 mln 840 biñ ruble yarımada bücetinden ayırılğan edi», – dep qayd ete matbuat hızmeti.
Matbuat hızmeti bildirgenine köre, Kreml kontrol etken Qırım Devdet şurasınıñ qararı ile sanat mektebiniñ müdiri Stanislav Belügağa «Qırımda nam qazanğan medeniyet hadimi» unvanı berildi.
«Oca, talebe, ana-babalar, Şçölkino şeeriniñ sakinleri qırmızı şeritni tantanalı sürette kesken soñ ders odaları baqıldı. Mektepte yañı meşrubatlı ders sınıfları, eki kontsert zalı – 72 yerli teatr ve muzıka zalı bar», – dep bildirdi matbuat hızmeti.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ihlâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
