Krasnodar ülkesindeki filtreme noqtasında bir ay evelsi açlıqqa başlağan sürgün etilgen Qırım faali Nedim Halilovnı hastahanege yatqızmağa azırlanalar. Bunı QHA Qaraçay faali Hasan Halkeçevniñ malümatına esaslanıp bildirdi.
«Vaziyet ket-kete kerginleşe. Tünevin, Nedim beynen bağlansam, sesi zorne kele edi», – dep ayttı Halkeçev.
Faqat, agentlikniñ subetdeşi aytqanı kibi, Halilov hastahanege yatqızılsa, zornen aşatılmasına qarşı çıqacaq.
Qırımtatar faali angi hastahanege yollanacaq şimdilik belli degil.
Halilovnıñ alı fenalaşqanını Ayder İsmailov da Facebookta bildirgen edi.
«Bazar künü bağlandıq. Vaziyet kritik. Küçü qalmağan, sesi zornen kele, qıbırdamay, yata», – dep yazdı İsmailov.
Halilov subetdeşine bildirdi ki, Rusiye Baş prokuraturasına onı özüni öldürmesine qadar çekiştirilmesi boyunca cinaiy iş açılması aqqında ariza yazmağa bitire. İsmailov aynı arizanı işğal etilgen Qırımnıñ prokuraturasına bergen.
Halilov Rusiye Baş prokuraturasına bergen arizasınıñ metnini Facebookta derc etken.
«Meni, Halilov Nedim Abdullayeviçni, 1986 senesinden şmdiki vaqıtqa qadar insaniy namusımı ıncıtıp, suiaqastqa ketirgenlerge qarşı cinaiy iş açmağa rica etem», – dep aytıla Halilovnıñ muracaatında.
Sürgün etilgen qırılmlı faaliyetçi Nedim Halilov bundan evel, Rusiye uquqqoruv müessiselerine muracaat etip, sağlığı fenalaşqan taqdirde hastahanege yatqızmağanlarını rica etti.
Noyabr 7 künü, Kreml kontrolündeki mahkemeniñ qararı ile qırımtatarı Nedim Halilov Qırımdan tış çıqarıldı. Halilovqa evine kirip, sıcaq urba, para ve vesiqalarını almağa imkân berdiler. Qırımtatar faali Zevid Gaziyev Facebookta yazğanı kibi, şimdi Halilov Krasnodar vilâyetinde filtreme noqtasında buluna.
