Link açıqlığı

Qara deñiz üzerinde Aleksandrov ansablniñ artistlerini ve doktor Lizanı alıp ketken uçaq qazalandı


Qara deñizde Tu-154 qazası

Rusiye Mudafaa nazırliginiñ Tu-154 uçağı Soçi yalısında qazağa oğradı, uçaqta 84 yolcu bula edi ve 8 insandan ibaret – uçucılar taqımı. Yolcular arasında Aleksandrov adına ansamblniñ artistleri bar, olar Suriyege barıp rus askerlerini hayırlaycaq ediler. Olardan ğayrı Rusiye haber vastalarınıñ vekilleri ve arbiyler de uça edi. Ansambl temsilcisiniñ sözlerine köre, kontsert Halep (Aleppo) şeerinde ötkerilmek kerek edi.

Artistlerni alıp ketken uçaq Moskva civarındaki Çkalov ava limanından, 25 dekabrge keçer gecesi uçtı. Yaqarlıq almaq içün Soçide qonğan edi, ve Moskva vıqıtına köre saat 5:20 olğanda kene avağa köterildi.

20 daqiqa soñra uçaq radarlarda ğayıp oldı; soñra belli olğanı kibi, uçuşnıñ yedinci daqiqasında, yükseklikke köterilmege devam etkeni arada, o tüşken eken. Yolcular arasında, Suriyedeki rus askerlerni hayırlamaq içün ketken Aleksandrov adına ansamblniñ artistleri, rus haber vastalarınıñ hadimleri ve askerler bar edi. Ansambl temsilcisiniñ bergen malümatına köre, kontsert Halep (Aleppo) şeerinde ötkerilmek kerek edi.

Moskva idaresiniñ medeniyet bölüginiñ yolbaşçısı Aleksandr Kibovskiy, qazanı izaatlar eken, Aleksandrov adına hor aqqında böyle dedi: «Olanı Kremlniñ yırlağan silâsı dep adlandıra ediler. Öyle de edi».

Hor artistlerinden ğayrı uçaqta Mudafaa nazirliginiñ medeniyet bölüginiñ müdiri Anton Gubankov ve onıñ yardımcısı Oksana Batrudinova uça ediler.

Uçaqta Birinci kanalnıñ üç jurnalistı (muhbir Dmitriy Runkov, operator Vadim Denisov ve ses operatorı Aleksandr Soydov), muhbir Mihail Lujetskiy, operator Oleg Pestov ve ses operatorı Yevgeniy Tolstoy terkibinde NTV çekim taqımı, ve «Zvezda» telekanalınıñ üç hadimi de buluna edi.

Rusiye Mudafaa nazirligi qazalanğan Tu-154 uçağınıñ yolcular cedvelini derc etti. Cedvelde 84 insan keçe, olarnıñ arasında Elizaveta Glinka (Doktor Liza). «Adaletli yardım» fondunıñ bergen malümatına köre, o Lattakiya bölgesindeki Tişrin üniversitet hastahanesi içün insaniy yardım alıp kete edi. Başta, Glinka bu uçaqnen sadece Soçige qadar uçmaq mümkün olğanı, soñra ise Suriyege uçmağa qarar alğanı bildirile edi, lâkin Yelizaveta Glinkanıñ aqayı Gleb, «Snob» mecmuasına qadınnıñ fevat etkenini tasdiqladı. Resmiy tasdiqlama daa peyda olmağanda, İnsan Aqları Şurasınıñ yolbaşçıcı Mihail Fedotov, Şuranıñ sitesinde taziye yerleştirdi:

Moskavadaki Helsinki gruppasınıñ yolbaşçısı Lüdmila Alekseyeva «Adaletli yardım» fondunıñ müdiri, Doktor Liza olaraq tanılğan Yelizaveta Glinkanıñ ölümü «büyük telef» olğanını ayttı. «O aziz insan edi», – dep beyan etti uquq qorçalayıcı.

Rusiye prezidenti Vladimir Putin dekabr 26 kününi umumilliy matem künü olaraq ilân etti.

«Fontanka» gazetasınıñ Mudafaa nizirligindeki menbaası, uçuqta büyük kölemde arbiy kâğıtlar, şu cümleden gizli vesiqalar, alıp ketilgenini bildirdi, ve taqiqatçılar terror eylemi yapılmaq mümkün olğanını red etmegenlerini ayttı. «İntarfaks» yaza ki, Tu-154 qazasınıñ sebeplerini taqiq etken komissiya, daa ziyade tehnikiy nuqsanlıqlarğa meil bere.

Mudafaa nazirliginiñ bergen malümatına köre, qazalanğan uçaq 1983 senesi çıqarılğan edi, episi olıp 6689 saat uçtı. Soñki tamir işleri 2014 sensi dekabrde ötkerilgen edi, plandaki teşkerüvlerni o 2016 sensi sentâbr ayında keçken edi. Uçaqnı «tecribeli pilot, birinci seviye uçucısı Roman Volkov» idare ete edi.

Yüz bergen qaza munasebetinen akimiyet komissiyasını teşkil ettiler, dep haber etti Rusiye Nazirler şurası. Komissiyanıñ reberi – Rusiye Naqliyat naziri Maksim Sokolov oldı, o endi Soçige uçtı. Mutehassıslar, qaza yerinde ilk cesetlerni taptılar. Qıdıruv işlerini Rusiye Fevqulâde vaziyetler nazirligi ve Mudafaa nazirliginiñ hadimleri alıp bara. FVN tarafından Soçige «Tsentrospas» ve «Lider» Merkezinden dalıcılar taqımı yollanıldı. Mutehassıslar dalıcı techizatınen, büyük terenlikte çalışmaq içün aletlernen, köçüci basım odalarınen ve «Falkon» idare etilgen cihazlarınen temin etilgenler.

Uçaqnıñ parçaları büyük sayıda toplanğan noqta sailden 6 kilometr uzaqlıqta yerleşe. «O yerde suv terenligi – 80 ve 110 metr arasında», – dep añlattılar Fevqulâde vaziyetler nazirliginde. Mudafaa nazirligi, qaza yerine gemi, helikopter, uçaq ve insansız ava cihazlarını yolladı. Soñki malümatlarğa köre, on ölüniñ cesedi tapıldı.

XS
SM
MD
LG