AQŞ prezidenti Barack Obama dekabr 23 künü «AQŞ milliy mudafaası ihtiçlarına 2017 senesi içün bücetni» imzaladı, dep haber ete Beyaz Saray. Vesiqağa binaen, Pentagonnıñ büceti tahminen 619 mlrd. dollarnı teşkil etecek. Bunen beraber 350 mln. dollar Ukraina içün telükesizlik saasında yardım sermiyalarınıñ ayırılması belgilendi.
«2017 senesi telükesizlik saasında Ukrainanğa berilecek yardm, 2016 senesi belgilengen 300 million AQŞ dollarına nisbetten, arttırılğan. Vesiqada, telükesizlik tedbilerini alması içün, Ukrainağa destek berilecegi ve şu cümleden öldürüci mudafaa aletleri temin etilecegi qayd etile. Yardım çeşitleriniñ cedveli – Ukrainanıñ devlet sıñırını nezaret etmek içün teşkil etilecek toplu sistemanıñ tehnikiy destegi ve masrafları, ve Ukraina arbiy küçleriniñ yüksek idaresi ve ştab zabitleriniñ azırlanması ile keñişletilgen», – dep bildire Ukrainanıñ Amerika Qoşma Ştatlarındaki elçiligi.
Ayrıca, qanun metininde Pentagon tarafından Kyivni desteklemek içün bütün sermiyadan ilk evelâ 175 mln. dollar qullanıla bilecek. Diger qısım, Mudafaa naziri ve Devlet kâtibi Kongressni «Ukraina akimiyeti telükesizlik saasınıñ islâatında salmaqlı adımlar atqanında» işandırğan soñ berilecek.
Aynı zamanda, AQŞ tarafından arbiy ihtiyaçlarğa etilecek tahsislerde Washingtonnıñ Rusiye ile işbirligi belli derecede sıñırlarndı ve «Ukrainanıñ topraqlarında işğal bitmegece ve oña qarşı ücümlar toqtatılmağance» böyle olacağı qayd etile.
Ukraina AQŞ idaresinen muzakereler keçirip, öldürüci şilânı bermek meseleseni defalarca kötere eti. Şimdige qadar AQŞ Ukrainağa ancaq «amelde öldürmeycek» arbiy yardım bere edi: vucut zırhı, tibbiy malzemeler, radio alâqa sistemaları, gece körüv cihazları, batareyağa qarşı radarlar, maşnalar.
AQŞ ve diger ğarbiy memleketler, şarqiy Ukrainadaki davanıñ arbiy usullarnen degil de, siyasiy yolnen çezilmesine qol tutqanlarını beyan eteler, ve şimdilik Ukrainağa resmiy şekilde öldürüci silânıñ berilmesine razı olmay, lâkin Rusiyeniñ ücümleri şiddetleşse böyle imkân inkâr etilmey.
