Link açıqlığı

Qırımda qırımtatarca ders bergen mektepler kerekli ders kitaplarınen temin etilgendir. Bunı Rusiye kontrol etken Qırım ükümetiniñ Tasil, ilim ve gençlik nazirliginiñ matbuat hızmeti bildire.

Matbuat hızmetiniñ malümatına köre, 2015-2016 seneleri nazirlikte 66 derslikniñ (ders kitabı, programma, luğatlar) tercime etilmesi, tüzetilmesi, neşir etilmesi ve berilmesinen bağlı işler yapıldı. Qırımtatarca basılğan dersliklerniñ sayısı cemi 61 biñ nushanı teşkil etkendir. Olarnıñ arasında fen kitaplarınıñ tercimesi, Rusiye Tasil ve ilim nazirliginiñ derslikleri cedveline qoşulğan «Qırımtatar tili (ana tili)», «Qırımtatar edebiyatı», «Qırımtatar tili (yabancı til)» programmaları bar.

«2016 senesi Qırımtatarca-rusça luğat ilk sefer basılğandır. 4 biñ sözli mektep luğatı qırımtatarca tasil alğan umumtasil teşkilâtlarnıñ talebelerine berilgen. Rusçadan ya da bu tilden deñiştirilmeyip alınğan sözler de qayd etile», – dep aytıla haberde.

Nazirlikniñ bildirgenine köre, Qırım bücetinden buña 46,7 million ruble ayırıldı. Derslikler qırımtatarca ders bergen mektep ve sınıflarğa berilgendir.

XS
SM
MD
LG