Link açıqlığı

Saatnıñ esas haberi

«Hizb ut-Tahrir davasınıñ» şahıslarını SİZO ve FSBde aşalaylar – «Qırım birdemligi»


«Hizb ut-Tahrir davası» boyunca qabaatlanğan Qırımnıñ siyasiy mabusları FSB hadimleri tarafından faal maneviy ve beden basqığa oğraylar. Bunı «Qırım birdemligi» birleşmesiniñ koordinatorı Abdureşit Cepparov Aqmescitte dekabr 24-de olıp keçken doquzıncı toplaşuvdan soñ ayttı, dep bildire Qırım.Aqiqat.

«Körüşüvde «Hizb ut-Tahrir davasınıñ» şahısları SİZOdan FSBge ketirilgende aşalanğanını aytılar. Bundan ğayrı, qollarını arqadan baylap, başlarına çuval kiydirip, yerge yatqızıp, maşinadan ayaqlarından tutıp çıqarğanlar. Köteksiz de olmadı. Elbet de, bu vaziyette olarğa er angi maneviy yardım kerek», – dep ayttı Cepparov.

Onıñ bildirgenine köre, apishanede davanıñ bir çoq şahsı sağlığı fenalaşqanını ayta. «Körüşüvde Qırım siyasiy mabuslarınıñ sağlığına dair malümat seslendirildi – yalıñız ekisiniñ sağlığı bir qarar kibi qala, qalğanları ciddiy problemler aqqında bildireler», – dep qayd etti uquq qorçalayıcı.

2016 senesi dekabr 6-da Aqyarda Qırım insan aqları bağ gruppası Qırımda Rusiye uquq qoruyıcıları apiske alğan musulmanlarnıñ qorantalarını topladı. Körüşüvge advokatlar da davet etildi.

«Qırım birdemligi» birleşmesi Rusiye uquq qoruyıcıları «Hizb ut-Tahrir» teşkilâtı ile bağlı olmasınen qabaatlağan insanlarnıñ tuvğanlarından ğayrı, Qırımnıñ diger siyasiy mabusları, em de qaçırılğan ve ğayıp olğan musulmanlarnıñ aileleri içün açıq oldı.

XS
SM
MD
LG