Yuqarı Radanıñ insan aqlarından vekâletlisi Valeriya Lutkovskaya ve Rusiyeniñ insan aqlarından vekâletlisi Tatyana Moskalkova Qırımda ve esas Ukrainada apiste yatqan bazı Ukraina ve Rusiye vatandaşlarınıñ ziyaret etilmesi aqqında añlaştılar. Bunı Tatyana Moskvalkovanıñ matbuat kâtibi Aleksey Zlovedov TASS agentligine bildirdi.
«Bu ziyaretler insan aqlarından vekâletlilerniñ mabuslarnıñ apishanedeki şaraitlerinen tanış olmaq, vatandaşı olğan devletniñ toprağında cezasını çekmek imkânlarını baqmaq isteklerinen bağlıdır», – dep qayd etti Zlovedov.
Onıñ aytqanına köre, ziyaretlerniñ vaqtı daa muzakere etile.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ihlâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
