Link açıqlığı

Qırımdaki mahkeme «Hizb ut-Tahrir davası» şahıslarınıñ apis cezalarınıñ uzatılmasından bergen şikâyet arizalarını red etti


Arsen Cepparov, arhiv fotoresimi

Cuma künü, dekabr 23-de, Rusiye kontrol etken Qırım Yuqarı mahkemesi «Hizb ut-Tahrir davasınıñ» şahısları Arsen Cepparov ve Refat Alimovnıñ apis cezalarınıñ uzatılmasından bergen şikâyet arizalarını red etip, Aqmescitteki Kiyev rayon mahkemesiniñ qararını deñiştirmedi.

Böylece, Arsen Cepparov ve Refat Alimov 2017 senesi fevral 8-ne qadar apiste yatacaqlar, dep bildirdi Qırım.Aqiqat mühbiri.

Bundan evel işğal etilgen Aqmescitniñ Kiyev rayon mahkemesi Cepparov ve Alimovnıñ apiste yatma müddetlerini eki ayğa qadar uzatqan edi – fevral 8-ne qadar, İsmailovnıñ – 2017 senesi mart 11-ne qadar.

Qızıltaş qasabasınıñ sakinleri Refat Alimov ve Arsen Cepparov 2016 senesi aprel ayında «Hizb ut-Tahrir» ile bağ tutmasında şeklenilip yaqalanğan ediler.

Rustem İsmailov ve daa beş qırımtatarı oktâbr 12-de Qırımda yaqalandı. Olarnı da «Hizb ut-Tahrir» islâm siyasiy teşkilâtında iştirak etmesi ile qabaatlaylar.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.


XS
SM
MD
LG