Cuma künü, dekabr 23-de, Kyivdeki Rusiye elçihanesi yanında faaller Rusiye prezidenti Vladimir Putinniñ Qırım «bahşışları» ile çuvalnı açtı. Olarnıñ arasında: Qırımda ukrainlerge qarşı açılğan 31 cinaiy iş, Qırımtatar Milliy Meclisi faaliyetiniñ yasaq etilmesi, Qırımda olıp keçken 20-den ziyade tintüv, 177 yaqalav, umumiy alğanda 89 yıl etken 9 qabaat ükmü. Faaller Rusiye işğal etken Qırımnıñ yıl neticelerini çıqarğan, dep bildire Qırım.Aqiqat.
Ediyeler performansı er ay Qırım işğali vaqtında ğayıp olğan insanlarğa «Ervin İbragimov qayda?» adlı qoltutuv aktsiyası çerçivesinde teşkil etilgendir. Altı aydan berli olar bu yerge kelip, aynı sual bereler, bugün er biri ne içün kelgenini ve bu mesele ne içün diqqatsız qalmamalı, dep añlatqanlar.
«Ukrainler ve bütün dünyağa böyle olmamalı, dep hatırlatmaq isteymiz», – dep ayta aktsiya iştirakçisi Anna.
Faal Mila tuvğan Qırımnı hatırladı: «olardan birisinen (Qırımda ğayıp olğanlardan – QA) 2014 senesine qadar bir trolleybusta olmağa, bir tükânğa barmağa ya da Ay-Petriden yalı boyunı seyir etmege imkânımız bar edi, şimdi bu insanlar bunı yapıp olamay, men de öyle. Er ay mında kelemiz, bu insanlar qorantalarına, biz ise Qırımğa qaytacağımızdan emin olmaq içün bunı yapamız».
«Añlayım, qırımlı, bu insanlarnıñ tanışı olmasam da, bu qorantalarnıñ accısını paylaşam. Er ay mında kelmek – Kyivde olıp yapmamız mümkün olğan eñ küçük şey», – dep ayta Anastasiya.
«Al-azırda 15 insannıñ alı ve bulunğan yeri belli degil, olardan 11 kişi – qırımtatarıdır», – dep hatırlattı «Krım SOS» teşebbüsiniñ koordinatorı Tamila Taşeva.
«KrımSOS» cemaat teşkilâtınıñ faalleri «Find&Free» kampaniyasını başlattı. Onıñ çerçivesinde ğayıp olğanlar qıdırılacaq ve mahküm etilgen qırımlılar azat etilecektir. Faaller dünya toplulığını ve faallerni qoşulıp, maqsatqa irişmek içün ğayretini birleştirmege çağıralar.
Dünya qırımtatar kongressi icra şurasınıñ azası Ervin İbragimov 2016 senesi mayıs 24-de Bağçasarayda belgisiz insanlar tarafından qaçırıldı. Video nezareti kamerası Rusiye yol inspektorları urbasında eki adam İbragimovnıñ maşinasını toqtatıp, onı mikroavtobusqa oturtqanını qayd etti.
Rusiyege boysunğan sabıq Qırım prokurorı Natalya Poklonskaya qayd ete ki, yarımadada 357 insannıñ bulunma yeri belgilenmegen, olardan 188 kişi belgisiz ğayıp oldı ve 169 adamnıñ soy-soplarınen bağı üzüldi. Qayd etilgen raqamdan 26 insan – qırımtatardır.
Qırım işğalinden soñ yarımadada insanlarnıñ, ekseriyeti qırımtatarlarnıñ, ğayıp olma adiseleri sıqlaştı. Bunen beraber Rusiyeniñ Qırımdaki Taqiqat komiteti tasdiqlay ki, «qırımtatarlarnıñ büyük sayıda ğayıp olması qayd etilmey».
Qırım uquq qorçalayıcı gruppasınıñ tahminlerine köre, insanlar Rusiye akimiyeti ya da onıñ kontroli altında bulunğan taqımlar tarafından qaçırıla bile. Qırım akimiyeti insanlarnıñ ğayıp olmasını tanıy, amma onıñ alâqası bar olğanını inkâr ete.
