Rusiye Tasil ve ilim nazirligi Qırım Cemaat palatasınıñ Rusiye mektep dersliklerine «Qırım baari» aqqında malümat qoşmaq ğayesine qoltuttı. Bunı Qırım Cemaat palatasınıñ yolbaşçısı Grigoriy İoffe «Sputnik v Krımu» radiosınıñ yayınında ayttı.
«Mektep programmasına, mektep dersliklerine Qırımnıñ Rusiyege qaytmasınen bağlı mevzu qoşulmasını isteymiz. Maalesef, Rusiyede duşmanlarımıznıñ aytqanlarını tekrarlap, işğal olğanını aytmağa devam etkenler bar, referendumımıznı yaramay tüşüneler. Ne olğanını añlatmaq kerek», – dep ayttı İoffe.
Onıñ bildirgenine köre, Qırımda alim, tarih ocaları, mektep müdirleri ve Cemaat palatasınıñ vekilleri bir işçi gruppağa birleşti. Yanvar ayında olar Tasil nazirliginde «Qırımnıñ Rusiye terkibine qaytması» bölüginiñ dersliklerge ilâve etilmesini muzakere etecekler.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ihlâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
