Kreml kontrol etken Qırımnıñ Yuqarı mahkemesi Sudaq mahkemesiniñ Alim Muslâdinov ve Ablâkim Ablâkimovğa qarşı çıqarğan qararından berilgen şikâyet arizalarını qanaatlendirmeyip, olarnıñ areketlerini farqlı tanıdı ve para cezasınıñ miqdarını 20 biñden 10 biñ rublege qadar eksiltti. Bunı Qırım.Aqiqat mühbiri bildire.
Toplaşuvda çıqışta bulunğan aktsiyanıñ eki iştirakçisi kütleviy tedbirlerde iştirak etmegenini, maşinalarında asılğan qırımtatar bayraqları içün yaqalanğanını aytqan.
Advokat Aleksandr Popkov mahkemeniñ diqqatını celp etmek içün şunı qayd etti ki, politsiya hadimleri eki künden soñ protokollarnı tizip, matem tedbirleri keçirilgen yerge yol alğan mahküm etilgenler ne kibi kütleviy tedbirde iştirak etkenini belgilep olamadı.
O, birinci instantsiya mahkemecileri Rusiyeniñ kütleviy tedbirler aqqında qanunlarını yahşı bilgeninden şübelengenini bildirdi.
«Maşinalar kolonnası areket etkende bir de bir miting keçirilmesi imkânsızdır», – dep ayttı advokat.
O, bayraqlarnıñ asılması kütleviy tedbir keçirilmesiniñ alâmeti olamaz ve bir de bir maqsat ya da ğayeni numayış etemez, dep qayd etti.
Dekabr 15-de Rusiye kontrol etken Qırım Yuqarı mahkemesi «Sudaq avtoyürüşi davasınıñ» eki iştirakçisi Enver Çavuş ve Seytmemet Seytumerovnıñ Sudaq şeeriniñ mahkemesi çıqarğan şikâyet arizalarını baqqan edi.
Yuqarı mahkeme birinci instantsiya mahkemesiniñ qararını deñiştirmedi, lâkin aydavcılarnıñ areketlerini «qanunsız mitingniñ teşkil etilmesi» kibi degil «pikette iştirak etmesi» olaraq tanıp, 20 biñ ruble yerine 10 biñ ruble para cezasını berdi.
2016 senesi 18 mayıs künü Sudaqlı qırımtatar faalleri maşnalarda qara şeretli qırımtatar milliy bayraqlarınen yürüş keçtiler. Bu içün olarnı mesuliyetlikke celp etmege istediler. Sudaq şeer mahkemesi gençlerniñ areketlerinde iç bir qanun bozuvını körmedi.
Sudaqnıñ şimdiki politsiya yolbaşçısı böyle qararnen razı olmayıp, oña qarşı şikâyet etti.
Rusiye İçki işler nazirliginiñ vekilleri 2016 senesi mayıs 18-de hatıra aktsiyasında iştirak etken aydavcılarnı kütleviy surette yaqalay edi.
Qırım Rusiye tarafından işğal etilgen soñ yarımadada qırımtatarlarnıñ evlerinde, camilerde tintüvler keçirilip başladı, adamlar diniy mensüpligine köre taqip etile, dep qayd ete Meclis temsilcileri ve uquq qoruyıcılar.
