Kreml kontrol etken Qırım Yuqarı mahkemesi advokat Nikolay Polozovnıñ Qırımtatar Milliy Meclisiniñ reis muavini Ahtem Çiygoznı kelecek sene aprel 8 kününe qadar apiste qaldırmaq mahkeme qararından bergen şikâyet arizasını baqıp red etti. Bunı İnsan aqları malümat merkezi bildire.
Advokat Aleksandr Lesnoy bildirdi ki, apiske alınğan vaqıttan berli çoq şey deñişti – mahkemede aman-aman 200 insan sorğuğa çekildi, olardan yalıñız 3 ya da 4 kişi Çiygoznı körgenini aytıp, bir de bir qanunsız areketler yapqanını körmegen.
Çiygoz siyasiy mabus olğanını bildirip, onı qırımtatar halqını qorquzmaq içün apiske alğanlar ve Cinaiy-protsessual kodekske riayet etilmegenini ayttı.
«Menim esnasımda körüne ki, Rusiyede mahkeme sisteması yoq, mında tek emirler çalışa», – dep qayd etti Ahtem Çiygoz.
Ketirilgen delillerge baqmadan, kollegiya reisi Karavayev şikâyetni qanaatlendirmedi. Ahtem Çiygoz 2017 senesi aprel 8-ne qadar apiste yatacaqtır.
Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, bu cümleden «Rus Birligi» firqası, miting iştirakçilerine qarşı çıqtı. İşğal olunğan Qırımnıñ Rusiye akimiyeti onı kütleviy çatışmalarnıñ teşkil etmesi ile qabaatlay.
Rusiye mahkemesi «Çiygoznıñ işini» «fevlral 26 işi» çerçivesinde, iyül 20-de mahkeme qapalı toplaşuvda «fevral 26 işini» ekige bölgen soñ oldı: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.
