Mahsus Qırım.Aqiqat içün
Romaniyada Parlament saylavlarında ğalebe qazanğan sotsial-demokratik fırqası tarafından beklenilmegen adım yapıldı. Olar yañı akimiyetiniñ yolbaşçısı olaraq qırımtatar qadını Sevil Şaidehni saylamağa teklif ettiler, bundan evel o Romaniya Regional inkişaf naziri edi.
Keçken sene Şaideh hanım, Romaniya nazirlerinden birinci olıp, Quranğa el qoyıp yemin etken edi. Şimdi ise o Romaniyada baş nazir vazifesine tain etilgen ilk qadın, ve Avropa Birliginde ilk musulman baş nazir olmaq mümkün. Em de Sevil Şaydeh bu maqamğa saylanılsa, o Klaus Iohannis ile birlikte çalışacaq – o ise alman ve protestanttır. Romaniyanıñ siyasiy leyhasını bundan daa güzel şekilde tasvir etmege, belki de, mümkün degildir.
Qırımda qırımtatarlarnıñ vekili akimiyet yolbaşçısı iç bir vaqıt olmadı
Sevil Şaideh Romaniya tatarlarınıñ vekili ola. Bu halq – Rusiye iperaratorluğı Qırımnı işğal etken soñ, yarımadanı terk etken musulman muacirlerini birleştire. Elbette ki, bu toplulıqnıñ esası – qırımtatarlar. Az sayıda olsalar da, romaniya tatarları er zaman Köstenceniñ içtimaiy ve siyasiy yaşayışında emiyetli yer ala ediler, mında qurulğan camiler ise olarğa Qırımnı hatırlara edi. Romaniyanıñ olacaq baş naziri de öz siyasiy yolunı Köstencede başlağan edi. Ve şimdi onıñ tain etile bileceği, atta sotsial-demokratik fırqanı desteklemegenlerni coştura: Şaydeh hanım – sadece mutehassıs degil de, öz firqasınıñ popülist safsatasını (şu cümleden, saylavaldı kampanyası devamında çoq kere seslendirilgen şovinistik şiarlarnı) yeñe bilecek birisidir.
Parlametteki çoqluq desteklese, Sevil Şaideh – 20 000 insanı teşkil etken milliy azlıqnıñ temsilcisi – Romaniya akimiyetiniñ yolbaşçısı olmaq mümkün.
Qırımda ise, ne birinci, ne de ekinci Rusiye işğalinden soñ akimiyet yolbaşçısı vazifesini iç bir qırımtatarı almağan edi.
Vitaliy Portnikov, jurnalist ve siyasiy izaatçı, Radio Svoboda közeticisi
«Fikir» rubrikasında bildirilgen fikir-tüşünceler müelliflerniñ noqtaiy-nazarlarını aydınlatıp, muarririyetniñ baqışları ile aynı olmaması mümkün
