Link açıqlığı

Kreml kontrol etken Qırım Yuqarı mahkemesinde dekabr 22-de Alim Muslâdinov ve Ablâkim Ablâkimovnıñ Sudaq şeeriniñ mahkemesi olarnı 2016 senesi mayıs 18-de memuriy cinayet işlemesi ile qabaatlı olaraq tanılmasına dair çıqarğan qararından şikâyet arizaları baqılacaqtır.

«Mence, birinci instantsiya qararını biraz tüzeterler, gençlerni kütleviy tedbir iştirakçileri olaraq tanıp, 20 biñ ruble para cezasını 10 biñ rublege qadar eksiltirler. Qırımtatarlarğa nisbeten yasaq tedbirleri deñişmez», – dep yazdı qırımlı Lenora Dülber Facebook saifesinde.

Oktâbr 27-de Rusiye kontrol etken mahkeme «Sudaqlı dört davasınıñ» bütün şahıslarını qabaatlı tanıp, memuriy cinayet işlegenini ayttı. Olarğa 20 biñ ruble para cezası berildi.

2016 senesi 18 mayıs künü Sudaqlı qırımtatar faalleri maşnalarda qara şeretli qırımtatar milliy bayraqlarınen yürüş keçtiler. Bu içün olarnı mesuliyetlikke celp etmege istediler. Sudaq şeer mahkemesi gençlerniñ areketlerinde iç bir qanun bozuvını körmedi.

Sudaqnıñ şimdiki politsiya yolbaşçısı böyle qararnen razı olmayıp, oña qarşı şikâyet etti.

Rusiye İçki işler nazirliginiñ vekilleri 18 mayıs 2016-da hatıra aktsiyasında iştirak etken aydavcılarnı kütleviy surette yaqalay edi.

Qırım Rusiye tarafından işğal etilgen soñ yarımadada qırımtatarlarnıñ evlerinde, camilerde tintüvler keçirilip başladı, adamlar diniy mensüpligine köre taqip etile, dep qayd ete Meclis temsilcileri ve uquq qoruyıcılar.

XS
SM
MD
LG