Link açıqlığı

Rusiye Tışqı işler nazirligi: «skit altınları» qararı Gaaga ambitsiyalarını yoq ete


«Qırım – Qara deñizniñ altını ve sırı» sergisinden

Amsterdam bölge mahkemesiniñ «skit altınları» qararı Gaaganıñ dünyanıñ uquq paytahtı olaraq tasdıqlanmaq planlarını yoq ete, dep bildirdi Rusiye Tışqı işler nazirligi.

«Amsterdam bölge mahkemesiniñ «Qırım – Qara deñizniñ altını ve sırı» sergisi eksponatlarınıñ Qırım müzeylerine degil, Ukrainağa berilmesine dair adaletsiz ve qanunsız qararı da aynı mantıqqa aittir. Bizim fikirimizce, bu qarar Gaaganıñ dünyanıñ uquq paytahtı olaraq tasdıqlanmaq maqsadlarını yoq ete», – dep tekrarladı Rusiye TİN resmi vekili Mariya Zaharovanıñ cevabını «RİA Novosti Krım» agentligi.

Qırım müzeyleri «skit altınları» davasınıñ neticelerinden «közleri qaytqanını ve şok olğanını» bildirgenler.

Amsterdamnıñ bölge mahkemesi dekabr 14-de «skit altınları» kollektsiyasınıñ Ukrainağa qaytarılmasına dair qarar çıqardı. «Qırım – Qara deñizniñ altını ve sırı» sergisi 2014 senesi fevral ayından avgust ayına qadar Amsterdamnıñ Allard Pirson müzeyinde numayış etilgen edi. Anda Qırımdaki skit, sarmat ve gotlarnıñ medeniyetini temsil etken dört Qırım müzeyiniñ eksponatları taqdim etilgen edi.

Qırım işğalinden soñ Ukraina akimiyeti eserler müzeyge degil de, Ukraina devletine ait, dep bildirdi. Qırım müzeyleri ise eksponatlarnıñ olarğa qaytarılmasını talap ettiler. Felemenk müzeyi eserlerni ne Ukrainağa, ne de Qırımğa bermedi ve mahkeme qararını ya da taraflarnıñ añlaşmasını beklegen edi.

Qırımnıñ dört müzeyi Amsterdam mahkemesinde Allard Pirson müzeyine qarşı dava açtırıp, kollektsiyanı Qırımğa qaytarmağa talap etken edi.

XS
SM
MD
LG