Advokat Nikolay Polozov Qırımtatar Milliy Meclisiniñ reis muavini Ahtem Çiygoznıñ davası boyunca 59-ıncı mahkeme oturışınıñ ketişatını Facebookta aydınlattı. Toplaşuvda Kreml kontrol etken Qırım Yuqarı mahkemesi fotoresim delilleriniñ tedqiq etilmesini devam ete.
«Bugün 64 fotoresim tedqiq etildi, 12:34-ten 12:41-ge qadar, yani – 7 daqqa. Bundan evel tedqiq etilgen fotoresimlerde olğanı kibi körüne ki, «Rusiyege qoltutqan» mitingniñ iştirakçileri Qırım Muhtar Cumhuriyeti Yuqarı Şurasınıñ azbarında mitingden bir buçuq saat ögüne bulunıp, Ukraina bayraqları ile resmiy miting iştirakçilerine keder etip, bayraqlarnı tutıp almağa, çatışmağa tırışalar. Qayd etmeli ki, Sergey Aksenov provokatsiyalar yanında tura. Ya o olarnı, ya da olar onı celp ete», – dep yazdı Polozov.
Advokat bildirdi ki, Ahtem Çiygoz eki fotoresimde bar, o, «o vaqıt vekâletlerini yerine ketirgen Qırımtatar Milliy Meclisiniñ diger azalarınen beraber miting iştirakçilerini tınçlandırmağa tırışa».
Polozov Ahtem Çiygoz davasınıñ 2017 senesi yanvar ayında olacaq mahkeme oturışlarınıñ cedvelini derc etken.
«Mahkeme Ahtem Çiygoz davasınıñ yanvar ayındaki mahkeme oturışlarınıñ cedvelini belgilegen: 16, 17, 18, 19, 23, 24, 25, 26, 30, 31, 1, 2», – dep yazdı Polozov.
Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, bu cümleden «Rus Birligi» firqası, miting iştirakçilerine qarşı çıqtı. İşğal olunğan Qırımnıñ Rusiye akimiyeti onı kütleviy çatışmalarnıñ teşkil etmesi ile qabaatlay.
Rusiye mahkemesi «Çiygoznıñ işini» «fevlral 26 işi» çerçivesinde, iyül 20-de mahkeme qapalı toplaşuvda «fevral 26 işini» ekige bölgen soñ oldı: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.
