Link açıqlığı

Saatnıñ esas haberi

Ukrain deputatlar gruppası dünya toplulığını Rusiyege qarşı sanktsiyalarnı Suriyedeki areketleri sebebinden küçlendirmege çağıra


Ukraina Yuqarı Rada deputatrlarından ibaret gruppa «Başer al-Asadnıñ rejimi ve Rusiye tarafından Suriyede yapılğan cinayetlerge dair» beyanat yerleştirdi. Böylece, parlament vekilleri dünya toplulığını Rusiyege qarşı sanktsiyalarnı Suriyede yapqan areketlerinden sebep küçlendirmege çağırdı.

«Biz, Ukraina millet vekilleri, büyük telâş ile Suriyedeki silâlı davanıñ kerginleşmesini taqip etemiz. Başer al-Asad rejimi ve onıñ ecnebiy ittifaqdaşları tarafından Halep (Aleppo) ealisiniñ qıyır-çıyır yoq eyilmesini köremiz. BM ve insaniy yardım teşkilâtlarınıñ malümatlarına köre, şeerde biñlerce yerli sakinler yoq etildi», – dep aytıla beyanatta.

Deputatlarnıñ fikirince, böyle vaziyet «Rusiye ve Dimaşq arasındaki muqavele neticesinde yüz berdi, olar terroristlerge qarşı küreşkenlerini aytıp, amelde ise sistematik surette ve qasten Suriye halqını yoq eteler».

«Rusiye Federatsiyası, Suriyede yapılğan arbiy cinayetlerde doğrudan özü iştirak ete. Buña Rusiye ava quvetleri ile Halepte ve diger yerlerde içtimaiy obyektler, şu cümleden hastahaneler ve insaniy yardım konvoyları viran etilgeni işaretley», – dediler ukrain deputatları.

Deputatlar dava etrafındaki er bir tarafnı deral arbiy areketlerni toqtatmağa çağıra ve «Suriyeteki arbiy cinayetlerniñ ortağı olğan Rusiye Federatsiyasına qarşı sanktsiyalar arttırılmaq kerek» olğanında israr ete.

Ukrain muzakerecileri bundan evel de Suriyedeki vaqialar munasebetinen seslene ediler, hususan oktâbr ayında olar Suriyedeki silâlı dava iştirakçilerini bütün memlekette ve hususan Halep şeerinde arbiy areketlerni toqtatmağa çağıra etiler.

Rusiye, İran ve Türkiye Tışqı işler nazirleri dekabr 20 künü Moskvada körüşüv keçirip, öz tarafından Suriyede ateşniñ toqtatılması ve insaniy yardım berilmesine imkân açılması içün areket eteceklerini ve er angi barışıq añlaşmasına kefil olacaqlarını beyan ettiler.

Suriyede 2011 senesi mart ayından berli devam etken davada Rusiye Suriye prezidenti Başer Asadnıñ tarafını tuta. 2015 senesi sentâb ayından berli Rusiye Suriyedeki arbiy areketlerge qoşuldı – ve amelde Suriyeniñ akimiyet quvetlerini destekley.

XS
SM
MD
LG