Link açıqlığı

Kreml kontrolündeki Qırım Yuqarı mahkemesi «Hizb ut-Tahrir» işiniñ daa eki iştirakçisi Emil Cemadenov ve Vadim Siruknıñ apis müddetiniñ uzatılmasına qarşı şikâyetlerini baqtı ve ilk mahkemeniñ qararını deñişmesiz qaldırdı, dep haber ete Qırım.Aqiqat muhbiri.

Cemadenov – 2017 senesi mart 11 kününe, Siruk – fevral 8 kününe qadar apiste qalacaqlar.

Emil Cemadenovnıñ advokatı Edem Semedlâyev, onıñ müşterisini «maşnanıñ tabanına yatqızıp, başına bir şeyler keçirip» taşığanlarını beyan etti.

Yaqalanğan Teymur Abdullayevniñ advokatı Emil Kurbedinov te «Hizb ut-Tahrir işniñ» iştirakçilerine qarşı qorqotuvlar seslendirilgenini bilirdi.

Oktâbr 12 künü Qırımda beş musulman ailede tintüvler keçirilgen edi. Tintüvlerden soñ beş qırımtatarı yaqalandı ve Rusiyede yasaq etilgen «Hizb ut-Tahrir» teşkilâtaında iştirak etkenlerinde qabaatlandılar: Rustem İsmailov, Uzair Abdullayev, Teymur Abdullayev, Emil Cemadenov ve Ayder Saledinov.

Yaltada çiçek satqan Vadim Siruk, «Hizb ut-Tahrir işi» boyunca qabaatlanıp, yarım yıldan ziyede apiste qala, o 2016 senesi fevral 11 künü yaqalanğan edi.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG