Almaniyanıñ paytahtı Berlinde Noel bazarına yük maşinasınıñ kirmesi neticesinde can bergenlerniñ sayısı 12 insanğa qadar arttı. Onlarnen kişi yaralandı, dep bildire paytahtnıñ politsiyası.
Almaniyanıñ resmiy şahısları ücüm planlaştırılğan edi, dep tahmin ete, taqiqat devam etmekte.
Politsiya yük maşinasınıñ aydavcısı olma ihtimali olğan şahısnı bazar yanında yaqaladı. Yolcu olğan ekinci kişi qaza yerinde can berdi.
DPA haber agentligi uquq qoruyıcı organlarında olğan qaynaqlarına esaslanıp, yaqalanğan kişi Almaniyağa ya Afğanistan, ya da Pakistandan qaçaq olaraq kelgenini bildire.
Poloniyanıñ TVN 24 telekompaniyası bildirdi ki, yük maşinası Poloniya naqliyat şirketine aittir. Saibi Ariel Juravskiy kütleviy haber vastalarına bergen malümatına köre, yük maşinasınıñ aydavcısı, eki doğmuş qardaşı Berlinge çelik alıp ketken ve 16 saat cevap bermegen edi.
Almaniya politsiyası yük maşinası hırsızlanğanını tahmin ete.
