Link açıqlığı

Qırımnıñ devlet fiyat ve tarif komiteti 2017 senesi devamında eali içün gaz fiyatını eki qat arttıra bile – birinci arttıruv yanvar 1-de ola bile, ekincisi iyül 1-den başlana bile. Bunı «Krıminform» Qırımnıñ devlet fiyat ve tarif komitetiniñ reisi Nina Zotoviçniñ malümatına esaslanıp bildire.

«Yılda eki kere fiyatlarnı deñiştirme aqqımız bar, amma bu aqqımıznı qullanacaqmızmı-yoqmı belli degil. Gaz teminlevi müessisesiniñ masraflarını teşkerip, kelgen kâr yeterli olğanını körsek, ekinci kere fiyatlar deñişmeycek», – dep qayd etti Zolotoviç.

Onıñ aytqanına köre, yaqarlıq Krasnodar ülkesinden de satın alınacaq. Qırımdaki fiyatlar Cenüp federal bölgesindeki seviyege qadar arttırılmalı, dep qayd ete Zotoviç.

Haber etile ki, Qırımda 2017 senesi yanvar 1-den başlap 1000 kubometr içün 1798,2 rubl miqdarında fiyatlarnı belgilendi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ihlâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG