Link açıqlığı

«Crimea-SOS» ğayıp olğan qırımlılarnı desteklemek içün Kyivdeki Rusiye elçiligi qarşısınıda aktsiya keçirecek


Kyivdeki Rusiye elçiligi qarşısınıda Qırımda ğayıp olğanlar içün destek aktsiyası, arhiv resimi

Dekabr 23, cuma künü «Crimea-SOS» cemaat teşebbüsi Rusiyeniñ Kyivdeki elçihanesi qarşısında aktsiya keçirip, işğal etilgen Qırımda ğayıp olğanlarğa destek bildirmege istey. Bu aqta merasimniñ Facebook saifesinde haber etile.

«Aktsiyada: ğayıp olğanlarnıñ qıdırılması boyunca milliy ve halqara seviyede yapılğan areketlerniñ neticelerini açıqlacamız; Find&Free halqara informatsion kampaniyasını taqdim etecemiz; teatr sanalaştırılması tarzında RF tarafından Qırım sakinlerine qarşı yapılğan qanunsız areketlerni kösterecemiz», – dep bildireler aktsiya teşkilâtçıları.

Qırımtatar regional Mecis azası Ervin İbragimovnıñ ğayıp olğanından eki ay soñra, iyül 25 künü #where_is_ervin #где_эрвин #де_ервін hashtag qullanılıp, aksiya başlanğan edi.

Dünya qırımtatar kongressi icra şurasınıñ azası Ervin İbragimov 2016 senesi mayıs 24-de Bağçasarayda belgisiz insanlar tarafından qaçırıldı. Video nezareti kamerası Rusiye yol inspektorları urbasında eki adam İbragimovnıñ maşinasını toqtatıp, onı mikroavtobusqa oturtqanını qayd etti.

Rusiyege boysunğan sabıq Qırım prokurorı Natalya Poklonskaya qayd ete ki, yarımadada 357 insannıñ bulunma yeri belgilenmegen, olardan 188 kişi belgisiz ğayıp oldı ve 169 adamnıñ soy-soplarınen bağı üzüldi. Qayd etilgen raqamdan 26 insan – qırımtatardır.

Qırım işğalinden soñ yarımadada insanlarnıñ, ekseriyeti qırımtatarlarnıñ, ğayıp olma adiseleri sıqlaştı. Bunen beraber Rusiyeniñ Qırımdaki Taqiqat komiteti tasdiqlay ki, «qırımtatarlarnıñ büyük sayıda ğayıp olması qayd etilmey».

Qırım uquq qorçalayıcı gruppasınıñ tahminlerine köre, insanlar Rusiye akimiyeti ya da onıñ kontroli altında bulunğan taqımlar tarafından qaçırıla bile. Qırım akimiyeti insanlarnıñ ğayıp olmasını tanıy, amma onıñ alâqası bar olğanını inkâr ete.

XS
SM
MD
LG