Advokat Nikolay Polozov Rusiye advokatlar cemiyetine muracaat etip, uquq qorçalayıcılarğa yapılğan er angi basqığa sert şekilde cevap bermege rica etti. Bunı advokat Facebook saifesinde yazdı.
«Qırımda insan aqlarınıñ kergin vaziyeti köz ögüne alınsa, advokatlar ve müşterileriniñ aqlarını bozacaq Rusiyeniñ Qırım ve Aqyardaki Federal havfsızlıq hızmeti idaresiniñ taqiqat organları Rusiye Federatsiyası devlet akimiyetiniñ diger organları, prokuratura, mahkeme ile bağlı, devlet akimiyeti advokatqa basqı yapa, bu regiondaki işimnen bağlıdır», – dep yazdı advokat.
Polozov FSB organları Rusiyede diger advokatlarğa da basqı yapqanını qayd etti.
«Yaqında belli oldı ki, Samara vilâyetinde de advokat şaat olaraq sorğuğa çağırılğan edi, bundan evel diger regionlarda da aynısı olğan edi», – dep yazdı advokat öz muracaatında.
Dekabr 13-de, Kreml kontrol etken Aqmescitniñ Kiyev mahkemesi FSB taqiqatçısı Skripkanıñ Nikolay Polozovnı Qırımtatar Milliy Meclisiniñ reis muavini İlmi Ümerovnıñ davasında şaat olaraq sorğuğa çekilmesi iznine dair muracaatını baqtı.
Polozov qarardan şikâyet etmek niyetindedir.
Nikolay Polozov mahkemede İlmi Ümerov davasınıñ şaatı olaraq sorğuğa çekilse, advokat davadan imayeci olaraq çetleştirilecektir.
