Herson vilâyetindeki Geniçeskke insan aqlarını muzakere etmek içün sabıq siyasiy mabus, Ukraina tışqı işler naziriniñ mesleatçısı Gennadiy Afanasyev kelmege planlaştıra.
Bunı Qırım.Aqiqatqa Geniçesk rayonınıñ devlet memuriyetiniñ yolbaşçı muavini, Qırımtatar Milliy Meclisiniñ azası Gülnara Bekirova bildirdi.
Onıñ aytqanına köre, dekabr 20-de fevqulâde vaziyetlerde insan aqları ve havfsızlığı meselelerine dair tögerek masanıñ keçirilmesi planlaştırıla.
Tögerek masanıñ programmasına binaen, Afanasyev insan aqlarınıñ qorçalanmasını añlatacaq. Pılıp Orlık demokratiya institutınıñ eksperti Natalya Belitser de qoşulacaq.
Tedbirni Geniçesk rayonınıñ devlet memuriyeti ve Qırımtatar Milliy Meclisi teşkil eteler.
Herson vilâyeti Qırım yarımadası ile yaqın. Esas Ukrainağa baqqanda eñ çoq qırımtatarı Herson vilâyetiniñ Geniçesk rayonında otura.
Rusiyede Gennadiy Afanasyev Qırımda terrorist cemiyetiniñ qurulması ile qabaatlanıp, 2015 senesi yedi yılğa qadar mahküm etilgen edi. Gennadiy Afanasyev ve daa bir ukrain Yuriy SOloşenko Ukrainağa 2016 senesi iyün 14-de qayttılar.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ihlâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
