Link açıqlığı

Rusiye akimiyeti taqip etken Qırım jurnalisti Nikolay Semena cumaaqşamı künü, dekabr 15-de, Kyivde açılışı olıp keçken foto eserleriniñ sergisini teşkil etken ukrain zenaatdaşlarına teşekkürlerini bildirdi.

«Ebet, o, (sergi – QA) müim. Birinciden, zenaat faaliyetimni sağındım. Fotoresimler zenaatımnıñ müim bir qısmı edi. Men mündericeli foto levhalarını yapmağa seve edim. Şimdi bu daa qıyıye. Ekinciden, Jurnalistler birligi ve tuvğan olğan «Den», Qırım.Aqiqat muarririyetleri maña qoltutqanına quvanam. Bu maña küç bere. Mence, bütün problemler tezden biter. Kene çalışacaqmız», – dep ayttı Nikolay Semena Qırım.Aqiqatqa.

O, ileride onıñ eserleri daa tolu fotoresimler sergisi şeklinde azırlanır, dep ümüt ete.

«Elbet de, tolu sergi yapmağa ister edim, amma şimdilik bu imkânsız bir şey. Malümat az, Qırımda foto çıqarmaq içün de bir sıra qıyınlıqlar bar. Amma ileride tolu sergi içün vaqıt kelir, dep tüşünem», – dep qoştı jurnalist.

Dekabr 15-de Kyivde Qırım jurnalisti Nikolay Semenanıñ «Tamamen alınğan» fotosergisi açıldı.Semenanıñ 20 yıllıq jurnalist faaliyeti devamında toplağan 11 fotoresim dekabr 15-de Kyivdeki Qırım evi divarlarında asıldı. Rusiye uquq qoruyıcıları Qırımda jurnalistniñ evinde tintüv keçirip, onıñ şahsiy bilgisayarından 900 gigabayt malümatnı alıp ketti.

Baarde Qırımda Qırım.Aqiqat ile işbirliginde şeklengen jurnalistlerniñ evlerinde tintüvler olıp keçti. Radio Svoboda müellifi Nikolay Semenağa qarşı Rusiye Federatsiyasınıñ topraq bütünligini bozmaq çağıruvları şeklenmesi ile cinaiy iş açıldı. Rusiye taqiqatı oña yarımadanı terk etmege yasaq etti.

Ukraina Tışqı işler nazirligi işğal etilgen Qırımda Ukraina vatandaşları, şu cümleden Nikolay Semenanıñ taqip etilmesinden qasevetlengenini bildirip, oña qarşı yapılğa basqını toqtatmağa çağırdı.

XS
SM
MD
LG