Link açıqlığı

Moskvanıñ advokatlar palatası Polozovğa «Ümerovnıñ davası» boyunca sorğuğa barmamağa tevsiye ete


«Ümerovnıñ davasında» imayeci olğan Rusiye advokatı Nikolay Polozov Moskvadaki advokatlar palatasınıñ şurasından tevsiye aldı. Anda «bu vaziyette taqiqatçınıñ sorğusına barmağa kerekmey», dep aytalar. Aynı vaqıtta advokatlar palatası sorğudan nasıl çetleşecegini añlatmadı. Bunı Nikolay Polozov Qırım.Aqiqatqa tarif etti.

Onıñ qayd etkenine köre, o, sorğularnı körmemezlikke ursa, taqiqatçınıñ onı zornen ketirme qararını çıqarmaq aqqı bar. Polozovnıñ fikirince, advokatlar cemiyeti advokatnıñ aqlarını qorçalama talabı ile çıqmalı, bu yapılmasa, «FSB taqiqatçısınıñ elleri çezilir».

«Advokat Polozov ve onıñ müşterileri aqqında laf ketmey, mesele advokatlar faaliyetiniñ anayasa temelinen bağlı – advokat sırı. Rusiyeniñ advokatlar cemiyeti indememege tırışsa, yahşı bir şey olmaycaq. Qırımda mümkün olsa, Tataristan, Çeçenistan, Moskvada da mümkün, demek. Rusiye Federatsiyasında advokat sırı institutı lâğu etile», – dep qayd etti Polozov.

Onıñ zanınca, bu meselede cemaat qoltutmaq kerek, faqat şimdilik sert bir cevap yoq.

«Rusiye ve Qırımdaki zor vaziyetni köz ögüne almaq kerek, akimiyetniñ menfaatları ile aynı fikirde olmağan insanlar cemaat alanından siline, olarnı körmemege tırışalar. Men zenaatdaşlarımnı fena tüşünmege istemeyim, amma mesele bütün Rusiyeniñ advokatlar cemiyeti içün pek ciddiy ola», – dep qoştı advokat.

Salı künü, dekabr 13-de, Kreml kontrol etken Aqmescitniñ Kiyev mahkemesi FSB taqiqatçısı Skripkanıñ Nikolay Polozovnı Qırımtatar Milliy Meclisiniñ reis muavini İlmi Ümerovnıñ davasında şaat olaraq sorğuğa çekilmesi iznine dair muracaatını baqtı.

Polozov qarardan şikâyet etmek niyetindedir.

Nikolay Polozov mahkemede İlmi Ümerov davasınıñ şaatı olaraq sorğuğa çekilse, advokat davadan imayeci olaraq çetleştirilecektir.

XS
SM
MD
LG