Link açıqlığı

Saatnıñ esas haberi

Ukraina Qırımda siyasiy repressiyalarğa alâqası olğanlarnı ceza cedveline qoşacaqtır – Klimkin


Pavlo Klimkin
Pavlo Klimkin

Ukraina Tışqı işler nazirligi Rusiyede ve işğal etilgen Qırımda ukrainlerniñ siyasiy sebeplerden apiske alınması esnaslarında iştirak etken insanlarnıñ adlarını ceza cedveline qoşmağa azırlana. Bunı dekabr 16-da Ukraina tışqı işler naziri Pavlo Klimkin bildirdi, dep haber ete «Gromadske».

«Birinciden, biz bu ceza cedveli üzerinde er daim çalışamız. Siyasiy mabuslarımıznıñ davaları esnaslarında iştirak etkenler aqqında malümat alıp, bu cedvelni tüzetmege tırışamız», – dep ayttı Klimkin.

Onıñ qayd etkenine köre, ceza cedveline qoşmaq içün deliller kerek.

«Siyasiy reinelerimiz Rusiyede ya da işğal etilgen Qırımda olsa, tuvğanları, halqara uquq qorçalayıcı teşkilâtları ve advokatlarından alğan malümatlarımız esasında cedvel tizmege tırışamız», – dep qayd etti Klimkin.

Onıñ aytqanına köre, al-azırda ceza cedveliniñ ilâvesi azırlana.

Oktâbr 31-de Ukrainanıñ Rusiyege qarşı keniş cezaları işke tüşürilgendir. Ukraina prezidentiniñ buyruğına binaen, 2015 senesi kirsetilgen ceza cedveline 335 insannıñ adı qoşuldı.

Rusiye işğal etken Qırım müessiselerinde reberiyette yer alğan Rusiye vatandaşı, yarımadanıñ işğalci akimiyette çalışqan, Qara deñiz flotu, Rusiye Silâlı quvetleriniñ komandanlığını yapqan ya da FSBni temsil etkenler cezalana.

XS
SM
MD
LG