Qırımtatar Milliy Meclisiniñ reis muavini İlmi Ümerov cuma künü, dekabr 16-da, Qırımdaki Rusiye FSB idaresine çağırılmasınıñ sebebi olğan videonı aydınlattı.
«Bugün advokatlar Emil ve Edem ile bareber FSB taqiqatçısı Skripka İ.A. ile körüştik. Buña «taqiqattan aldın teşkerüv» deyler. Taqiqatçığa Kyiv telekanallarından birinde (17 kanal – QA) yayınğa çıqqan Skype bağımdan sebep meni sorğuğa çekmege emir etildi. FSB maña qarşı yañı cinaiy işler aça bile», – dep bildirdi Ümerov Facebookta.
Ümerov taqiqatçılarnıñ köstergen videonı derc etti.
Dekabr 16-da Qırımtatar Milliy Meclisiniñ reis muavini İlmi Ümerov FSBge sorğuğa çağırıldı, oña video boyunca taqiqattan aldın teşkerüv keçirilgenini haber etkenler.
Mayıs 12-de Qırımnıñ sabıq prokurorı Natalya Poklonskaya FSB taqiqatçıları İlmi Ümerovğa qarşı ekstremizm maddesi boyunca cinaiy iş açqanını bildirgen edi.
Qırımtatar milliy areketiniñ meşur iştirakçisi, Meclis reisiniñ muavini İlmi Ümerovnıñ yaqalanması, evinde keçirilgen tintüv ve oña qarşı cinaiy iş açılması, mecburiy mahkeme-psihik ekspertizanıñ keçirilmesi içün psihiatrik hastahanede tutılması cemaat arasında ve halqara seviyede büyük rezonans doğurğan.
