Link açıqlığı

Qırımdaki Rusiye Taqiqat komiteti advokat Polozovğa qarşı cinaiy iş açılmasını red etti


Qırımdaki Rusiye Taqiqat komiteti Qırımda qırımtatarlarğa qarşı açılğan bir sıra davada imayeci olaraq iştirak etken Rusiye advokatı Nikolay Polozovğa qarşı cinaiy iş açmağa razı olmadı.

Taqiqattan aldın teşkerüv sentâbr ayından berli Rusiye ceza kodeksiniñ üç maddesi boyunca yapıldı: prokuror ya da taqiqatçınıñ işine kirişme; mahkemege sayğısızlıq; akimiyet vekiliniñ açıq aqaretlenmesi.

Taqiqat komitetiniñ işbu qararı advokatnıñ yapqanlarında cinayet olmağanından qabul etildi, dep bildirdi Polozov Qırım.Aqiqatqa.

İmayeci qayd ete ki, teşkerüv vaqtında oña nisbeten baqılğan yalıñız eki madde aqqında haber etilgen edi.

«294-ünci madde – adaletke mania olma – menim içün sürpriz oldı. Kene yahşı, bunı cinaiy iş açılmasınıñ red etme qararında kördim. Kerçekten, küldürecek bir sebep, çünki eki lingvistik teşkerüv oldı, prokurornıñ canı ağırğan internet laflarında bir de bir aqaret tapılmağan edi. Adaletke mania areketleri, esnas iştirakçilerine aqaretleme de olmadı. Bu sözler kimge ait bile belli degil. Bese-belli, Qırım prokuraturası maña basqı yapacaq edi», – dep ayttı advokat.

Polozovnıñ fikirince, Qırım prokuraturasınıñ böyle bir teşebbüsi sabıq ukrain hadimleriniñ Rusiye yolbaşçılığı ögünde «sadıq körünmek» istekleri ile bağlıdır.

İş açılmasa da, advokat «basqı devam etkenini» qayd ete.

«Al-azırda Federal havfsızlıq hızmeti tarafından İlmi Ümerovnıñ davası boyunca basqı yapıla. Meni advokat sırı olğan malümatlar boyunca şaat olaraq sorğuğa çekecek olalar. Qanun bu alda advokatnı sorğuğa çekmege yasaq ete», – dep qoştı Polozov.

XS
SM
MD
LG