Qırımtatar Milliy Meclisiniñ reis muavini İlmi Ümerov FSBge sorğuğa çağırıldı, oña video boyunca taqiqattan aldın teşkerüv keçirilgenini haber etkenler. Bunı dekabr 16-da advokat Emil Kürbedinov bildirdi.
«Bugün İlmi Ümerovnen FSB binasında edik. Taqiqatqa köre, İlmi Ümerov Qırım, Rusiye ve Ukrainanen bağlı meseleler boyunca izaat bergen video boyunca daa bir taqiqattan aldın teşkerüv keçirilgenini ayttılar», – dep tarif etti advokat.
Kürbedinovnıñ aytqanına köre, sorğudan soñ cinaiy iş açılacaqtır.
«Nevbetteki adım – cinaiy iş açılmasıdır. Taqiqatçı Ümerovnı sorğuğa çekmege tırıştı. O, şimdilik bir de bir malümat bermedi», – dep qayd etti advokat.
Mayıs 12-de Qırımnıñ sabıq prokurorı Natalya Poklonskaya FSB taqiqatçıları İlmi Ümerovğa qarşı ekstremizm maddesi boyunca cinaiy iş açqanını bildirgen edi.
Qırımtatar milliy areketiniñ meşur iştirakçisi, Meclis reisiniñ muavini İlmi Ümerovnıñ yaqalanması, evinde keçirilgen tintüv ve oña qarşı cinaiy iş açılması, mecburiy mahkeme-psihik ekspertizanıñ keçirilmesi içün psihiatrik hastahanede tutılması cemaat arasında ve halqara seviyede büyük rezonans doğurğan.
