Link açıqlığı

Kyivde Nikolay Semenanıñ foto-sergisi açıldı


«Bütünley çıqarılıp alınğan» Nikolay Semenanıñ foto-resimler sergisiniñ açılışında

Qırımlı jurnalist Nikolay Semenanıñ foto-resimlerini taqdim etken «Bütünley çıqarılıp alınğan» serlevalı sergi Kyivde dekabr 15 künü açıldı. Qırım Evi divarlarında 11 fotoresim asılğan – bu, Semenanıñ jurnalistik faaliyeti vaqıtında 20 yıl devamında toplanılğan arhivniñ kiçik bir qısımı. Merasim teşkilâtçıları añlattılar ki, jurnalistniñ dairesinde Qırımda Rusiye mahsus hızmetiniñ vekilleri tintüv keçirgenleri vaqıtta, olar şahsiy komryüterden 900 GB malümat çıqarıp aldılar.

Sabıq siyasiy mabus Gennadiy Afanasyev «Bütünley çıqarılıp alınğan» sergide
Sabıq siyasiy mabus Gennadiy Afanasyev «Bütünley çıqarılıp alınğan» sergide

«Bu işlerni o özü bizge, yerleştirmemiz içün yolladı. Er bir fotoresim astında onıñ yazğan qısqa metini ketirile, fotoresim aqqında tarif etile. Bizler mahsus iç bir şey deñiştirmefik, tüzetmedik, çünki çoqusı yerde o birinci şahıs olaraq ikâye ete ve bu ikâyeler pek duyğulı ola», – dep qayd etti «Crimea SOS» teşebbüsiniñ idarecisi Tamila Taşeva.

Qırımlı jurnalistniñ foto-icadınen tanış olmaq içün, Semenanı daa ziyade gazetici kibi tanığan ve onıñ maqalelerini bilgen, işdeşleri keldi. Qırım Eviniñ salonında cemaat erbapları, uquq qorçalayıcılar, Qırım sakinleri toplaştı.

«Nikolay Semena içün bu büyük maneviy destek olacaq – serginiñ özü de, onıñ icadınen tanış olmaq içün açılışqa kelgen insanlarnıñ sayısı da. Nikolay – istidatlı insan, cesür, biz onı küçlü jurnalist, parlaq talilci-jurnalist olaraq bilemiz... Nikolaynıñ indemeyip oturğanını istegenler bunı yapıp olamazlar. O şimdi er şeyni aytıp olamay, lâkin resim çekmege devam ete», – dedi Qırım.Aqiqat baş-muarriri Volodımır Prıtula.

Tamila Taşeva ve Volodımır Prıtula
Tamila Taşeva ve Volodımır Prıtula

Sergi teşkilâtçıları Skype vastasınen Semenanen bağlanamağa istey ediler, lâkin o vaqıtta jurnalist Qırımdaki Rusiye mahsus hızmetlerniñ binasında bulunıp, cinaiy işni ögrene edi.

Taqiqat ceryanı aqqında Kyivde Semenanıñ advokatı Andrey Sabinin tarif etti.

«Taqiqatnı bir ayğa uzattılar, altı cıltqa birleştirilgen olarnıñ «tapqan» malümatlarını ögrenmek içün... Yanvarniñ ortası-soñu, ve iş endi mahkemege tüşmek mümkün... Nikolay pek faal insan, özü teşebbüs kösterip bütün altı cıltnı fotoresimlerde qayd etti, ve mına şimdi arqası ağırıp ketti (o arqasını tedaviylemek içün Ukrainağa kelmege istey edi), şimdi biraz hastalandı», – dedi advokat.

Açılış merasimi çerçivesinde «Qırımda jurnalistika: azat etüv yolu» mevzusında muzakereler ötkerildi.

Jurnalist ve cemaatçılar Rusiye akimiyetine basqı yapmaqnıñ, ve dünya toplulığı arasında Qırımdaki vaziyet aqqında malümat tarqatmaqnıñ kerekligini qayd ettiler.

«Bu insanğa professional faaliyeti sebebinden basqı yapılmasın talabınen, Rusiye akimiyetine basqımıznı toqtatsaq, men bellesem, Nikolay Semenanıñ işi azat etilmesi yöñelişinde ketmeycek», – dedi Taşeva.

«Künlük qasevetlerinen meşğul olıp, insanlar unutalar, ve ukrainlilerni Qırımnen, ukrainlilerni Qırımlılarnen birleştirgen insanlar arasındaki bağ üzüle. Hatırlatmamız kerek: anda da insanlar qaldı, olar pervasız degiller, işğalci akimiyetniñ yaratqan şaraitlerine baqmadan küreşmege devam eteler», – dedi Ukraina Haber siyaseti naziriniñ mesleatçısı Yüliya Kazdobina.

Baarde Qırımda Qırım.Aqiqat ile işbirliginde şeklengen jurnalistlerniñ evlerinde tintüvler olıp keçti. Radio Svoboda müellifi Nikolay Semenağa qarşı Rusiye Federatsiyasınıñ topraq bütünligini bozmaq çağıruvları şeklenmesi ile cinaiy iş açıldı. Rusiye taqiqatı oña yarımadanı terk etmege yasaq etti.

Ukraina Tışqı işler nazirligi işğal etilgen Qırımda Ukraina vatandaşları, şu cümleden Nikolay Semenanıñ taqip etilmesinden qasevetlengenini bildirip, oña qarşı yapılğa basqını toqtatmağa çağırdı.

XS
SM
MD
LG