Link açıqlığı

Amsterdam mahkemesiniñ qararı Qırım Ukrainağa ait olğanını ifadeley – Poroşenko


Ukraina prezidenti Petro Poroşenko

Ukraina prezidenti Petro Poroşenko Facebookta Amsterdam mahkemesiniñ «skit altınlarınen» bağlı qararını izaatladı.

«Amsterdam bölge mahkemesiniñ qararı Ukrainağa yalıñız «skit altınları» ait olğanını ifadelemey. Qırım da Ukrainanıñdır, Qırım – bizim, noqta. Bunı Avropa memleketiniñ qararı köstere», – dep bildirdi Ukraina prezidenti.

Amsterdamnıñ bölge mahkemesi dekabr 14-de «skit altınları» kollektsiyasınıñ Ukrainağa qaytarılmasına dair qarar çıqardı.

«Qırım – Qara deñizniñ altını ve sırı» sergisi 2014 senesi fevral ayından avgust ayına qadar Amsterdamnıñ Allard Pirson müzeyinde numayış etilgen edi. Anda Qırımdaki skit, sarmat ve gotlarnıñ medeniyetini temsil etken dört Qırım müzeyiniñ eksponatları taqdim etilgen edi.

Qırım işğalinden soñ Ukraina akimiyeti eserler müzeyge degil de, Ukraina devletine ait, dep bildirdi. Qırım müzeyleri ise eksponatlarnıñ olarğa qaytarılmasını talap ettiler. Felemenk müzeyi eserlerni ne Ukrainağa, ne de Qırımğa bermedi ve mahkeme qararını ya da taraflarnıñ añlaşmasını beklegen edi.

Qırımnıñ dört müzeyi Amsterdam mahkemesinde Allard Pirson müzeyine qarşı dava açtırıp, kollektsiyanı Qırımğa qaytarmağa talap etken edi.

XS
SM
MD
LG