Qırım müzeyleri Amsterdam bölge mahkemesiniñ «skit altınları» kollektsiyasını Kyivge berme qararından şikâyet etecektir, dep bildirdi bu esnasta Qırım müzeyleriniñ menfaatlarını qorçalağan «İnyurkollegiya» advokatlarınıñ uquqçısı Anastasiya Sivitskaya «RİA Novosti Krım» agentligine.
«Ukrainağa berme qararı dava apellâtsion mahkemede baqılğan soñ işke tüşürile. Şikâyet etecekmiz», – dep ayttı advokat.
Sivitskayanıñ qayd etkenine köre, qarar «añlaşma şartlarına zıt kele».
Kreml kontrol etken Qırım medeniyet naziri Arina Novoselskaya Amsterdam mahkemesiniñ qararını «siyasiy» dep adladı, ve «ahlâq ve dünya müzeyleriniñ munasebetlerine zıt kele», dep ayttı.
Amsterdamnıñ bölge mahkemesi dekabr 14-de «skit altınları» kollektsiyasınıñ Ukrainağa qaytarılmasına dair qarar çıqardı.
«Qırım – Qara deñizniñ altını ve sırı» sergisi 2014 senesi fevral ayından avgust ayına qadar Amsterdamnıñ Allard Pirson müzeyinde numayış etilgen edi. Anda Qırımdaki skit, sarmat ve gotlarnıñ medeniyetini temsil etken dört Qırım müzeyiniñ eksponatları taqdim etilgen edi.
Qırım işğalinden soñ Ukraina akimiyeti eserler müzeyge degil de, Ukraina devletine ait, dep bildirdi. Qırım müzeyleri ise eksponatlarnıñ olarğa qaytarılmasını talap ettiler. Felemenk müzeyi eserlerni ne Ukrainağa, ne de Qırımğa bermedi ve mahkeme qararını ya da taraflarnıñ añlaşmasını beklegen edi.
Qırımnıñ dört müzeyi Amsterdam mahkemesinde Allard Pirson müzeyine qarşı dava açtırıp, kollektsiyanı Qırımğa qaytarmağa talap etken edi.
