Link açıqlığı

Rusiyeniñ Yuqarı mahkemesi Cemilevniñ Rusiyege kiriş yasağından bergen şikâyetini red etti


Mustafa Cemilev

Rusiyeniñ Yuqarı mahkemesi Ukraina halq deputatı, qırımtatarlarnıñ lideri Mustafa Cemilevniñ memleketke beş yıllıq kiriş yasağıın qanunğa uyğun dep tanıdı.

Böylece, mahkeme Cemilevniñ advokatı Mark Feyginniñ şikâyetini red etti. Moskva şeer mahkemesiniñ Cemilevniñ kiriş yasağı aqqında qararı işke tüşürildi.

Advokat Feyginniñ Twitterde yazğanına köre, imaye tarafı Avropa insan aqları mahkemesine muracaat etecek.

2014 senesi Rusiye uquq qoruyıcıları Mustafa Cemilevge işğal olunğan yarımadağa kiriş yasağı aqqında haber etkenler. Aynı yasaq Qırımtatar Milliy Meclisiniñ reisi Refat Çubarovğa da ilân etilgen edi.

Bu sene Qırımnıñ Rusiye akimiyeti işğal etilgen yarımadada Qırımtatar Milliy Meclisiniñ faaliyetini estremizm ile qabaatlap yasaq etti. AQŞ, Avropa birligi, Ukraina ve Türkiye bu yasaqnı takbih ettiler.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ihlâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG