Qırım Rusiye tarafından 2014 senesi qanunsız şekilde ilhaq etilgen soñ yarımadanı 50 biñ insan terk etti, olarnıñ yarısı – qırımtatarları. Böyle malümatnı Qırımtatar Milliy Meclis reisi Refat Çubarov dimlomatik elçilikler, Ukrainadaki halqara struktura ve teşkilâtlar vekillerinen er sene ötkerilgen körüşüv devamında beyan etti, dep haber ete UNN.
Qurım 2014 senesi mart ayında Rusiye tarafından işğal etilgen soñ, çoqusı insanlar yarımadanı terk etti ve qıtaiy Ukrainağa çıqtı. Ukraina İçtimaiy siyaset nazirligi 18 yülge qadar Rusiye işğali astında qalğan Qırımdan ve Donbasnıñ bölgeleinden köçip kelgen 1 million 774 biñ 627 insannı esapqa aldı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ihlâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
