Salı künü, dekabr 13-de, Kreml kontrol etken Aqmescitniñ Kiyev mahkemesi FSB taqiqatçısı Skripkanıñ Nikolay Polozovnı Qırımtatar Milliy Meclisiniñ reis muavini İlmi Ümerovnıñ davasında şaat olaraq sorğuğa çekilmesi iznine dair muracaatını baqtı. Bunı Qırım.Aqiqat mühbiri haber ete.
Polozovnıñ advokatı Oksana Jeleznâk mahkemege oturışnıñ başqa künge avuştırılması aqqında ariza bergen, faqat mahkemeci işni imayesiz baqmağa qarar aldı.
Nikolay Polozov ve İlmi Ümerovğa qoltutmağa kelgenlerniñ aytqanına köre, mahkeme oturışınıñ kâtibi zalğa diñleyicilerni almayıp, bu oturışqa kirmek içün tekrar qayd olmaq kerek olğanını ayttı.
«O (kâtip – QA), bizni içeri almadı, qayd olmadıq. Soñra keç olğanını ayttı. Biz bütün mahkemelerge kirişte qayd ola edik. Böyle bir şey ilk sefer oldı», – dep ayta şaatlar.
Böylece, mahkemeci Nikolay Polozovnıñ İlmi Ümerovnıñ davasında şaat olaraq sorğuğa çekilmesi qararını qapalı qapular artında ilân etti, ne Polozov, ne advokatı Jeleznâk, ne de diñleyiciler bar edi. O, mahkeme oturışından soñ da qararını aydınlatmadı.
«Qarar kopiyalarını dava taraflarına yollaycaqlarını ayttılar. Başqa bir şey yoq», – dep ayttı İlmi Ümerovnıñ qızı – Ayşe.
Nikolay Polozov mahkemede İlmi Ümerov davasınıñ şaatı olaraq sorğuğa çekilse, advokat davadan imayeci olaraq çetleştirilecektir.
