Link açıqlığı

«Çiygoz davasınıñ» nevbetteki mahkeme oturışında qabaat tarafı olmayğan qurulışlar imzalağan vesiqalarnı berdi. Bunı dekabr 12-de advokat Nikolay Polozov Qırım.Aqiqatqa tarif etken.

Advokatnıñ bildirgenine köre, prokuror zarar körgen Arbatlı ve qabaat şaatı Şlâginni tapmaq imkânsız olğanına dair vesiqalarnı bermege tırıştı. Prokuror Federal migratsion hızmetiniñ müüri olğan vesiqalarnı berdi.

«Men FMH yarım yıldan berli yoq, Rusiye prezidentiniñ buyruğı esasında dağıtılğanını ayttım. Bu vesiqalar kerçek degildir. Prokuror bu muracaatından vazgeçmege mecbur oldı», – dep añlattı Nikolay Polozov.

Dekabr 12-de Polozov Çiygoznıñ apis cezasını uzatmaq qararından şikâyet etecegini aydınlattı.

Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, bu cümleden «Russkoye Yedinstvo» («Rus Birligi») firqası, miting iştirakçilerine qarşı çıqtı. İşğal olunğan Qırımnıñ Rusiye akimiyeti onı kütleviy çatışmalarnıñ teşkil etmesi ile qabaatlay.

Rusiye mahkemesi «Çiygoznıñ işini» «fevlral 26 işi» çerçivesinde, iyül 20-de mahkeme qapalı toplaşuvda «fevral 26 işini» ekige bölgen soñ oldı: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.

XS
SM
MD
LG