Link açıqlığı

«Ukrain diversantı» Andrey Zahtey Rusiye Taqiqat komitetine FSB hadimleri tarafından azap çektirilgeninden şikâyet etti. Bunı dekabr 12-de «Mediazona» haber ete.

Zahteyniñ aytqanına köre, eki kün devamında mahsus hızmetlerniñ hadimleri onı qıynadı. O, uquq qoruyıcılarnıñ areketlerini teşkerip, olarnı mesüliyetke çekmege talap ete.

«Meni eki kün tok ile qıynadılar. Ayaq ve yanbaşqa tok işletip, cinayet işlegenimni tanımağa talap ettiler. Men adiy bir taksi aydavcısı olğanını ve ateş açılğan yerge müşteri isteginen kelgenini aytqan edim, amma olar meni qıynamağa devam ettiler», – dep bildirdi Zahtey arizasında.

Dekabr 8-de daa bir «ukrain diversantı» Yevgeniy Panov da Rusiye Taqiqat komitetine ariza yazğan. O, FSB hadimleri tarafından azap çektirilgenini aydınlattı.

Avgust 10-da Rusiye Federal havfsızlıq hızmeti bildirdi ki, avgust 7-ne keçer gecesi işğal olunğan Qırımda yarımadada terakt azırlağan «ukrain diversantları» gruppası yaqalandı. Ukraina akimiyeti bunı inkâr etip, Rusiye mahsus hızmetleriniñ «provokatsiyası» olğanını bildirdi.

Rusiye mahsus hızmetleri bildire ki, Yevgeniy Panov ve Andrey Zahtey «diversantlar gruppasınıñ» azaları ola.

Oktâbr 10-da Aqmescitniñ Kiyev rayon «mahkemesi» Panov ve Zahteyniñ apis cezasını dekabr 10-na qadar uzattı. Oktâbr 13-de Moskvanıñ Cemaat nezaret komissiyasınıñ azaları Panov ve Zahteyni «Lefortovo» SİZOsında körgen.

XS
SM
MD
LG