Ukraina Qırımda qanunsız alda yaqalanğan ukrainler, şu cümleden Qırımtatar Milliy Meclisiniñ reis muavini Ahtem Çiygoznıñ azat etilmesini talap ete, dep bildirdi dekabr 12-de Twitterde Ukraina Tışqı işler nazirliginiñ matbuat kâtibi Maryana Betsa.
«İşğalci Qırım Muhtar Cumhuriyetinde insan aqlarını bozmağa devam ete. A.Çiygozğa çıqarılğan qararnı uquq ceetinden takbih etemiz. Rusiyede qırımtatarlarğa yapqan basqısını toqtatmağa, A.Çiygoz ve qanunsız alda yaqalanğan diger Ukraina vatandaşlarını azat etmege talap etemiz», – dep yazdı Betsa.
Bazarertesi künü, dekabr 12-de, Qırımdaki «mahkeme» Ahtem Çiygoznıñ apis cezasını 2017 senesi fevral 8-ne qadar uzattı.
Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, bu cümleden «Russkoye Yedinstvo» («Rus Birligi») firqası, miting iştirakçilerine qarşı çıqtı. İşğal olunğan Qırımnıñ Rusiye akimiyeti onı kütleviy çatışmalarnıñ teşkil etmesi ile qabaatlay.
