Ankarada Rusiyege qoltutqan qurulışlar dekabr 12-de halqara diplomatik missiyalar ve Türkiye ükümetiniñ vekilleri iştiraki ile keçirilgen konferentsiyanıñ keçirilmesine keder etmege tırıştılar. Bunı QHA Emil Kürbedinovnıñ malümatına esaslanıp bildire.
Onıñ aytqanına köre, konferentsiya teşkilâtçıları basqıdan sebep jurnalistlerge tedbirni çıqarmağa ve aydınlatmağa izin bermedi.
«Ziyaretimizniñ birinci kününden başlap basqı yapıla, biz tenbiyelengen edik. Bir çoq jurnalist tedbirge kelmedi. Ankarada Rusiyege qoltutqan qurulışlar Qırımnıñ tamır halqı qırımtatarlar, qırımlı musulmanlar ve diger siyasiy mabuslarınıñ aqları bozulmasınıñ aydınlatılmasını blok etmek içün faaliyet köstere», – dep ayttı advokat.
Türk-Ukrain işbiriligi cemiyetiniñ reisi Namık Kemal Bayar qayd etkenine köre, Rusiye Federatsiyasınıñ elçihanesi Türkiye ve dünya toplulıqlarına Qırımda insaniyetlik ve insan aqlarına qarşı cinayetlerni aydınlatacaq olğan tedbirni bozmaqnen beraber diger teşkilâtlarğa da basqı yapa.
«Ankaradaki Rusiye elçihanesi Medeniyet ve yardımlaşma derneginiñ Baş ofisi, BDQK (Dünya qırımtatar kongressi – QA), Ukrain-Türk işbirligi cemiyeti azırlağan tedbirlerniñ keçirilmesini lâğu ettirecek areketler yapıp, iş tutqan diger teşkilâtlarımızğa da basqı yapqanını ögrendik. Rusiye «insan aqları» ibaresinden bile qorqa, ğaliba», – dep ayttı o.
Dekabr 10-da Ankarada İnsan aqları künü munasebetinen Qırım aqqında "Gibrid sürgünlik» adlı vesiqalı fotoresimler sergisi açıldı. Sergi teşkilâtçılarından biri tarihçı, Radio Svoboda mühbiri, fotoressam Anton Naumlük dey ki, «Gibrid sürgünlik» adı «fevral 26 davası» boyunca mahküm etilgen Ahtem Çiygoznıñ ana-babası ile keçirilgen intervyü sebebinden saylanğan. Subette «şimdiki halqara vaziyette halqnı bir vagonğa mindirip, Uralğa alıp ketmege imkân olmağanı aytıldı. Amma yaşayış dayanamaycaq alğa kelecek şaraitler yaratmaq mümkün».
Sergi açılışında olğan sabıq siyasiy mabus Gennadiy Afanasyev «bunıñ kibi tedbirler Rusiye teşviqatına qarşı yapıla bilecek eñ semereli iş olğanını» ayta.
