Advokat Nikolay Polozov, Qırımtatar Milliy Meclis reisiniñ muavini Ahtem Çiygoz içün apis müddeti uzatılmasına qarşı şikâyet etecek. Advokatnıñ böyle beyanatı aqqında Qırım.Aqiqat muhbiri bildire.
«Biz bu qararğa şikâyet etecemiz», – dedi Polozov.
Aqmescitte dekabr 12, bazarertesi künü Qırımtatar Milliy Meclis reisiniñ muavini Ahtem Çiygoznıñ işi boyuca nevbetteki mahkeme oturışu prokurornıñ üç muracaatınen başlandı.
Birincisi – zarar körgen Arpatlı ve şaat Şlâgin tapılmağanlarınen bağlı. Bunen beraber prokuror, üzerinde FMS (Federal Migratsion hızmetiniñ - QA) müüri urulğan vesiqanı kösterdi.
«Men mahkemege, FMS yarım yıl evelsi tarqatılğanını, prezident fermanı ile yoq etilgenini beyan ettim. Ve bu tüzetivler, bes-belli, yararlı degiller. Neticede prokuror bu muracaatnı red etmege mecbur oldı», – dep añlattı advokat Nikolay Polozov.
Prokurornıñ ekinci muracaatı Şura binasınıñ malına berilgen zarar ile bağlı edi. Polozovnıñ sözlerine köre, bu zarar taa 2016 senesiniñ başında, qabaatlanğan Nebiyevniñ grajdanlıq davası çerçivesinde endi qaytarılğan edi.
«Biz, bozulğan mefruşat aqqında bu malümatlarnı deliller sırsından çıqarmağa muracaat ettik, lâkin mahkemeciler bunı red ettiler», – dedi advokat.
Prokurornıñ üçünci müim muracaatı Çiygoznıñ apis müddetini daa 3 ayğa uzatmaqnen bağlı edi. Onıñ apis müddet 8 yanvar 2017 senesi yekünlenmek kerek edi. İmayeniñ itirazlarına baqmadan, mahkeme onıñ apis müddetini 8 aprel 2017 senesine qadar uzattı.
Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, bu cümleden «Russkoye Yedinstvo» («Rus Birligi») firqası, miting iştirakçilerine qarşı çıqtı. İşğal olunğan Qırımnıñ Rusiye akimiyeti onı kütleviy çatışmalarnıñ teşkil etmesi ile qabaatlay.
Rusiye mahkemesi «Çiygoznıñ işini» «fevlral 26 işi» çerçivesinde, iyül 20-de mahkeme qapalı toplaşuvda «fevral 26 işini» ekige bölgen soñ oldı: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.
