Link açıqlığı

Qırımlı Arifov «Alraid» birliginiñ reisi oldı


«Alraid» («Ögde ketken») Bütün Ukraina cemaat teşkilâtlarınıñ birligi, esabat-saylav toplaşuvında Bassil Mareei yerine yañı yolbaşçı olaraq 38-yaşındaki Seyran Arifovnı sayladı. Bunı Qırım.Aqiqatqa Arifov özü tasdiqladı.

«Müddet – dört yıl, meni ilk kere yolbaşçı vazifesine sayladılar. Esas vazifeler – islâmğa çağıruv, musulmanlar arasında qardaşlıq, semetdeşler ile yahşı munasebetler, islâm aqqında yañlış fikirler ve hyrafatlarnıñ tüzetilüvi, muhtaclarğa yardım ile oğraşmaq», – dedi Arifov. O daa çoq emiyet mekteplerniñ açılmasına bergenini qayd etti.

Bundan evel Arifov «Alraid» BUCTB teftiş komissiya yolbaşçısı edi. O Aqmescitteki «Kebir Cami» medresesini bitirdi ve Trablus (Lübnan) üniversitetinde Şeriat ve islâm ilimleri fakultetinde bakalavr diplomını qazandı. Tasil alğan soñ Aqmescitte Hafızlıq medresesiniñ müdiri oldı, 2014 senesi Kyivke köçti. Arifovnıñ ana-babası sürgünlikte Samarqandta doğdılar, babasınıñ ailesi Bağçasaray rayonından, anasınıñ ailesi – Yaltadan çıqqan ediler.

«Alraid» BUCTB Kyivde 1997 senesi arap memleketlerinden kelgen musulmanlar taraından teşkil etilgen edi. O Ukrainanıñ bir sıra regionlarında çalışqan 20 cemaat teşkilâtını, ve büyük şeerlerdeki İslâm medeniyet merkezlerini birleştire. Birlikniñ faaliyeti maarif ve hayririyet işlerinen bağlı.

XS
SM
MD
LG