Link açıqlığı

Yermay İhrac Etken Devletler Birligi (OPEC) ve birlikke kirmegen yermay istisalcıları dekabr 10, cumaertesi künü, 15 yıl devamında ilk kere, çıqarılacaq yermaynıñ kölemini azlaştırmağa añlaştılar. Global añlaşma 2017 senesinden başlap küç alacaq.

Viyanada ötkerilgen acele toplaşuvda, Rusiye künde çıqaracaq yermayınıñ kölemini 300 biñ varilge (barrelge) eksiltmege razı oldı, Meksika – 100 biñ varilge, Azerbaycan – 35 biñge, Umman – 40 biñge ve Qazahistan – 20 biñ varilge.

Bunen beraber añlaşmanıñ eda etilmesini nezaret etecek komitetni teşkil etmege qarar alındı. OPEC teşkilâtından – Cezair, Kuveyt ve Venezuela, teşkilâtqa kirmegenlerden – Rusiye ve Umman bu komitetniñ azaları olacaqlar.

Eki afta evelsi OPEC – soñki 8 yılda ilk kere – yermaynıñ çıqarılmasını künde 1 million 200 biñ varilge eksiltmege qarar alğan edi.

Eki yıldan ziyade yermay fiyatları dünyada ucuz edi, bu bir-çoq devletniñ büjetine menfiy tesir etken edi, bazı yerlerde atta cemiyetiñ itirazına sebep oldı.

XS
SM
MD
LG