Kreml kontrolündeki Aqmescit şeer şurasınıñ deputatı, RF Kommunistler fırqasınıñ vekili Stepan Kiskin, Rusiyedeki, Qırımdaki ve Aqyardaki akimiet organlarına muracaat etip, prezident Vladimir Putinge Rusiye Qaramanı unvanını bermek içün teşebbüs köstermege çağırdı. Bunı deputatnıñ matbuat-hızmeti bildire.
«Zanımca, Vladimir Vladimiroviç Putin, devlet va halq ögünde yapqan yararlıqları içün berilmesi mümkün olğan eñ yüksek unvanğa lâyıqtır. Qırımda 2014 senesi keçirilgen ve neticede Qırımnı Rusiyege qavuştırğan referendum devamında, onıñ tutqan nazar noqtası, devlet lideri Rusiye Federatsiyasınıñ Qaramanı unvanına lâyıq olğanını köstere», – dep buyurıla açıq muracaatta.
Deputatnıñ sözlerine köre, Qırım sakinleri, yarımadanıñ energetik bloladasınıñ problemlerini çezmege yardım etkeni içün, Putinge minnetdarlar.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ihlâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
