Ukraina prezidenti tarafından berilgen vazifelerni eda etip, Qırımğa yayınlarnıñ berilmesini tiklemek ve Karaçun dağında TV qullesini küçleçendimek içün kerekli tedbirlerni Kyivte muzakere ettiler. Bunı Ukraina Haber siyaseti nazirliginiñ matbuat-hızmetinde dekabr 8 künü bildirdiler.
«Ukrain yayınlarınıñ berüv küçüni sıñır yanındaki topraqlarda 100-200 Wt qadar küçlendirmek, ve «Armiya FM» (Ordu FM) rasiosını 10 kWt küçü ile yayınlamaq imkânlarnı baqıp çıqmağa kerek», – dedi Ukraina TV ve radio yayınlav sualleri boyunca Milliy şura azası Sergey Kostinskiy.
Bunen beraber, komissiya azaları, Qırımğa yolanılacaq ukrain yayınlarını küçlendirmek içün alman bericilerini yerleştirmek içün uyğun olğan mesken yerlerni belgilediler.
«Bu yöñelişte komissiya, Çaplınkadaki qulleden yayın yollamağa qarar aldı», – dep qayd ettiler matbuat-hızmetinde.
Dekabr 2 künü Çonğarda TV ve radio qullesiniñ temeline birinci blok qoyuldı. Dekabrniñ soñunda Qırım sakinleri gece-kündüz devamında çalışacaq dört ukrain radiostantsiyasını eşitip olacaqları beklenile.
Ukraina TV ve radio yayınlav sualleri boyunca Milliy şurası Herson vilâyetinde televizyon ve radio yayınlarınıñ inkişaf ettirilmesi ve işğal etilgen Qırımğa yayınlarnıñ tarqatılması içün mahsus strategiya leyhasını azırladı. Strategiyanıñ maqsadı – Herson vilâyetiniñ daa çoq yerine analog ve dijital yayınlarnı yetkizmek, ve işğal etilgen topraqladan çıqqan efir yayınlarını Herson vilâyetiniñ cenübiy taraflarına yibermemektir.
