Herson regional Meclisi ve Qırımtatar maaliy merkezi dekabr 10-da işğal etilgen yarımada ile memuriy sıñırda «Qırım – qanunsızlıq toprağıdır» adlı uquq qorçalayıcı aktsiyanı keçirecek olalar. Bunı Qırımtatar maaliy merkeziniñ saytı haber ete.
Teşkilâtçılarnıñ aytqanına köre, tedbir dünya insan aqları kününe bağışlana, aktsiyanıñ esas maqsadı – dünya toplulığınıñ diqqatını işğal etilgen Qırımda insan aqlarınıñ qorçalanması ve qırımtatar halqınıñ aq-uquqları meselesine celp etmektir.
«Saat 10:00 Geniçesk ve Maharadzevskiy rayonlarınıñ dostluq abidesi yanında toplaşıp avtokolonnalar şekillenecektir. Saat 10:30 kolonna «Çonğar» kiriş-çıqış nezaret noqtasına yol alacaq, anda siyasiy mabus, işğal etilgen Qırımda öldürilgen ve qaçırılğan insanlarnıñ fotoresimleri ile piket keçirilecektir. Tedbir çerçivesinde aktsiya iştirakçileri Qırımnıñ vatandaş qamaçavı faallerine baracaq ve «Vatan oğrunda küreş: qırımtatarlar» vesiqalı filmini seyir etecekler. Faaller içün uquq qorçalayıcı faaliyet meselelerine bağışlanğan ders keçirilecektir», – dep aytıla haberde.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ihlâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
