Uquq qorçalayıcılar Rusiye işğal etken Qırımda Rusiyege qoltutqan faaller taqip etilmege başlağanını qayd ete. Bunı dekabr 8-de İnsan aqları malümat merkeziniñ yolbaşçısı Tatyana Peçonçik Qırım.Aqiqat saytına bildirdi.
«Başta işğalge qoltutqan, soñra ise ukrain adetine köre yerli bozuvlarnı tenqit etmege başlağan jurnalistlerge qarşı cinaiy işler açıla ve olar ücüm nişanı olalar. Rusiyeni destelegen ve işğalge qoltutqan faallerge miting keçirmege bermeyler, bugün ise olar memnün olmayıp, narazılıq bildirmege azırlar. Böyle şeyler Qırımda ola, ukrain haberlerinde bular pek az aydınlatıla. Bizler uquq qorçalayıcılar olaraq bunı qayd etip, insan aqları yalıñız Ukrainağa qoltutqan qırımlılar ya da qırımtatarlar içün degil, olar er bir insan içün barlar, dep aytamız», – dep qayd etti Peçonçik.
Uquq qorçalayıcılar serbestlikniñ bozulması (ifade serbestligi, barışıq toplaşuvlarnıñ aqqı) ileride Qırımda er angi insanğa zarar ketireceginden qorqa.
Oktâbr ayında Qırımda uquq qorçalayıcılar jurnalistke basqı yapılğanını qayd etti. «Rusiye gazetası» neşiriniñ Qırım bölüginiñ hadimi Marina Reznikova işten boşatılğan edi.
Qırım.Aqiqat qaynaqlarınıñ malümatına köre, Reznikova işten boşatıldı, bunıñ sebepleri belli degil ve zenaat işinen bağlı olmasa kerek.
Ukraina Tışqı işler nazirligi işğal etilgen Qırımda ukrain vatandaşlarınıñ taqip etilmesinden qasevet etkenini bildirip, basqılarnı toqtatmağa çağırdı. TİN halqara toplulıqqa muracaat etip, Rusiye insan aqları ve ifade serbestligini bozmasın, ukrain siyasiy mabusları ve esirlerini azat etsin dep, oña qarşı bütün uquqiy ve siyasiy basqı usullarını qullansın istedi.
