2014 senesi esir etilgen ve öldürülgen qırımtatar faali Reşat Ametovğa alâ bu künge qadar Ukraina Qaramanı unvanı berilmedi. Bunı Qurultaynıñ Teftiş komissiya yolbaşçısı Ali Özenbaş «XXI asırda Ukraina: meiller ve inkişaf imkânları» konferentsiyası devamında beyan etti.
«Bizim öyle bir vatandaşımız bar edi – Reşat Ametov. O mitinglerde iştirak etmez edi, Milliy Meclisniñ faaliyetinde iştirak etmedi. O işğalge qarşı zorbalıqsız usullarnen, elinden kelgeni qadar küreşe edi, yani o, köküsinde narazılıq şiarını asıp, çoq insanlı yerlerde buluna edi. Bir keresi onı küpe-kündüz maalde, kamuflâjlı insanlar alıp kettiler, soñra ise onıñ cesedi bir çoq qıynav izleri ile tapıldı. Kimler onı qıynap öldürgenleri añlaşıla! İşte, defalarca seslendirilgen teklifke baqmadan, ölümden soñ olsa da, devlet yolbaşçısı öyle de onı Ukraina Qaramanı unvanı ile taqdirlemege lütuf etmedi», – dedi Özenbaş.
Qırımda 2014 senesi mart 3 künü Reşat Ametov Aqmescitteki Qırım Nazirler Şurasınıñ binası yanına kendi narazlıqnı bildirmek içün çıqtı. Martnıñ 15-de ise onıñ cesedi bir çoq qıynav izleri ile Qarasuvbazar rayonında ormanda tapılğan edi. Qırım akimiyeti qırımtatar faaliyetçiniñ qatilini tapqanını mukâfatnen taqdirlemege söz bergen edi. Lâkin qatil alâ daa bulunmağan.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ihlâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
