Avgustnıñ başında Qırımda yaqalanğan ve «Qırımlı diversant» olaraq qabaatlanğan, Ukraina vatandaşı Yevgeniy Panov FSB hadimleri tarafından köteklenile ve qıynavlarğa oğratıla edi. Bunı 8 dekabrde onıñ advokatı Dmitriy Dinze beyan etti, dep bildire Mediazona.
«Demir boru ile başım, arqam, büyreklerim, qollarım, ayaqlarım etrafında ura ediler. Ellerimi arqadan, üyüşkenlerine qadar, kelepçelernen sıqa ediler, kelepçelerden asa ediler. Ayaqlarımı tizlerimde büküp, ellerimi tizlerimden aşağı kelepçelernen bağlap, tizlerimniñ tübüne demir tayaq soqa ediler, bundan soñ eki erkek, eki taraftan tutıp, bu tayaqnı ve meni kötere ediler, bundan maña pek ağırta edi», – degen Panovnıñ sözlerini Dinze seslendirdi.
«Bundan ğayrı, qıynavlar vaqıtında cinsiy muçeme qırçma taqıp, siyarğanına qadar sıqa ediler, ve aynı zamanda: «Sen kimni patlatmağa keldiñ?», dep soray ediler. Men bu sualge cevap berip olamay edim, çünki menim böyle maqsadım yoq edi, ve men añlamay edim, ne içün olar böyle tüşüneler», – dedi Panov.
Yaqalanğannıñ advokatı dey ki, bundan soñ Panovnı, başına çuval keçirip, azbarğa çıqardılar ve «qurşunğa tizeceklerini, ayttılar».
«Çuvalnı başından qısqa müddetke çıqarğanları vaqıtta, Panov, onı qıynağan eki erkerni körüp, közden keçirdi: körünüşlerinden olar 35 yaşlarında ediler, ve «diversant» olarnı körüp tanımağa azır», – dedi advokat Dmitriy Dinze.
Advokatnıñ sözlerine köre, Panov Rusiyeniñ Taqiqat komitetiniñ idaresine muracaat etip, onı yaqalağan FSB hadimleriniñ areketlerini qanun ceetinden teşkirmege rica etti.
Avgust 10-da FSB bildirdi ki, avgust 7-ge keçer gecesi «ukrain diversantları» taqımı yaqalandı, olar sanki Qırımda terakt azırlay ekenler. Bundan ögüne zapt etiilgen Qırımnıñ Rusiye kontrolündeki memuriy sınırnıñ keçitleri üç kün devamında qapatıla edi.
Rusiye mahsus hızmetleri, Yevgeniy Panov ile Andrey Zahteyni – yarımadanıñ turistik ve içtimaiy infrastruktura obyektlerinde terrakt yapmağa niyetli olğan «diversantlar grupasınıñ» azaları olaraq tanıta.
Oktâbr 10 künü, Aqmescitniñ Kiev rayon «mahkemesi» Panov ve Zahtey içün apis müddetini 10 dekabrge qadar uzattı. Oktâbr 13 künü Moskvanıñ Cemiyet közetüv komissiyası Panovnı ve Zahteyni «Lefortovo» apishanesinde taptı.
